اسلام آباد (نیوز ڈیسک)حاملہ خواتین کے متعلق یہ تاثر عام پایا جاتا ہے کہ ان کی یاداشت قدرے کمزور پڑجاتی ہے، کبھی کوئی چیز کہیں رکھ کے بھول جاتی ہیں تو کبھی کوئی ضروری کام ذہن سے نکل جاتا ہے۔
دوسری جانب سائنسدانوں نے ایک تازہ تحقیق کے بعد یہ خیال رکھنے والوں کو مشورہ دیا ہے کہ وہ فوراً اپنی تصیح کرلیں کیونکہ نہ صرف یہ بات درست نہیں ہے بلکہ حقیقت یہ ہے کہ حاملہ خواتین کی یادداشت عام خواتین سے بہتر ہوتی ہے اور ماں بننے کی تیاری کرنے والی خواتین کی ذہنی صلاحیت کو قدرت اور اچھا کر دیتی ہے۔ یونیورسٹی آف ویسٹرن اونٹاریو کی اس تحقیق میں 54خواتین پر متعدد دماغی تجربات کئے گئے اور انہیں ذہانت کے ٹیسٹ دیئے گئے۔ تحقیق کاروں کا کہنا ہے کہ حمل کے دوران دماغ میں گرے میٹر (Grey Matter)کی مقدار میں اضافہ ہوجاتا ہے جو بہتر زہنی صلاحیت اور اچھی یاداشت کا سبب بنتا ہے۔ ڈاکٹر الزبتھ ہیمپس نے تحقیق کے بارے میں بات کرتے ہوئے بتایا کہ لوگوں کے نام، ایڈریس، فون نمبر اور چہرے یاد رکھنے جیسی صلاحیت میں حاملہ خواتین دیگر خواتین سے بہترپائی گئیں، اور اس بات کی تردید ہو گئی کہ حمل کی وجہ سے یادداشت پر منفی اثر پڑتا ہے۔ یہ تحقیق جریدے “Hormones and Behavior”میں شائع کی گئی۔