نئی دلی (نیوز ڈیسک) کلکتہ شہر سے تعلق رکھنے والی خاتون موسومی دام کچھ ماہ سے پیٹ کے درد میں مبتلاءتھی اور جب یہ درد شدت اختیار کرگیا اور اس کے ساتھ یرقان کا مرض بھی لاحق ہوگیا تو 49 سالہ خاتون نے بالآخر ہسپتال جانے کا فیصلہ کیا۔ڈاکٹروں نے موسومی کے درد کی وجہ معلوم کرنے کیلئے الٹراسونی گرافی ٹیسٹ کیا تو پتے میں پتھری کا انکشاف ہوا، لیکن یہ کیس اس لحاظ سے غیر معمولی اور ناقابل یقین ثابت ہوا کہ خاتون کے پتے میں ایک، دو یا پچاس، سو نہیں بلکہ کئی سو چھوٹے چھوٹے پتھر موجود تھے۔ خاتون کا آپریشن کرنے والے 59 سالہ ڈاکٹر مکھن لال ساہانے بتایا کہ جب آپریشن شروع کیا گیا تو انہیں اندازہ نہ تھا کہ وہ اپنی زندگی کا حیرت انگیز ترین آپریشن کرنے والے ہیں۔انہوں نے بتایا کہ جب پتھر نکلنا شروع ہوئے تو ان کی تعداد ختم ہونے میں نہیں آرہی تھی اور ایک گھنٹے کے آپریشن میں کل 360 کنکریاں خاتون کے پتے سے نکالی گئیں۔ ڈاکٹر مکھن لال کا کہنا تھا کہ ان کی 37 سالہ پروفیشنل زندگی میں یہ پہلا موقع ہے کہ کسی مریض کے پتے سے اتنی بڑی تعداد میں پتھر برآمد ہوئے۔
انہوں نے بتایا کہ تمام کنکریاں تقریباً 5mm کی سائز کی تھیں اور ان کی شکل بھی ایک جیسی تھی۔ پتے میں کنکریوں کی اتنی بڑی تعداد جمع ہونے کی وجوہات کے بارے میں ان کا کہنا تھا کہ کولیسٹرول کی بہت زیادہ مقدار یا پانی بہت کم پینا ایک وجہ ہوسکتی ہے، مگر اس خاص کیس کے بارے میں ابھی کچھ بھی یقینی طور پر نہیں کہا جاسکتا۔