نئی دہلی (نیوز ڈیسک)بھارتی ریاست مغربی بنگال کی رہائشی موسمی دام کے پتے سے ڈاکٹرز نے 360پتھریاں نکالی ہیں۔کلکتہ سے تعلق رکھنے والی 49سالہ موسمی دام شدید پیٹ درد اور معدے کی جلن کی شکایت کررہی تھیں۔گزشتہ ماہ انہیں یرقان کی شکایت بھی پیدا ہوئی جس پر وہ ڈاکٹر کے پاس گئیں۔ٹیسٹ اور الٹرسانڈ سے معلوم ہوا کہ وہ پتے کی پتھری کی مریضہ ہیں اور ان کا کیس انتہائی شدید نوعیت کا ہے۔الٹراسانڈ رپورٹ میں دکھائی دینے والے چھوٹے سائز کے کنچے برابر پتھر دیکھ کے خود ڈاکٹرز بھی حیران رہ گئے تھے۔انہیں فوری طور پر کولکتہ کے پوسٹ گریجوایشن میڈیکل ایجوکیشن اینڈ ریسرچ انسٹی ٹیوٹ روانہ کیا گیا جہاں ایک گھنٹے طویل آپریشن کے بعد ان کے پتے سے تمام پتھریاں نکال دی گئیں۔اس آپریشن میں حصہ لینے والے ڈاکٹر مکھن لعل ساہا کا کہنا ہے کہ انہوں نے اپنے پورے کیریئر میں کسی بھی انسان کے پتے میں اس قدر بڑی تعداد میں پتھریاں نہیں دیکھی ہیں۔یہ مغربی بنگال کی تاریخ کا پہلا آپریشن ہوگا جس میں اس قدر زیادہ پتھریاں نکالی گئیں۔یہ پانچ ملی میٹر سائز کی تھیں اور انہیں نکالنے میں تقریبا پچاس منٹ لگے۔ درحقیقت میں جس وقت آخری پتھری نکال رہا تھا، اس وقت تک میرے ہاتھ سن ہورہے تھے۔حیران کن امر یہ ہے کہ یہ تمام پتھریاں ایک ہی سائز اور شکل کی تھیں۔آپریشن میں خاتون کا پتہ بھی نکال دیا گیا ہے۔ماہرین کے مطابق پتے کی پتھری کی بنیادی وجہ اگرچہ کولیسٹرول کا اکھٹا ہونا ہوتا ہے تاہم یہ بھی ممکن ہے کہ پانی کی کمی کی وجہ سے یہ پتھریاں بن جائیں۔