نیویارک(نیوزڈیسک) دنیا میں لوگوں کی اکثریت کمر کی تکلیف میں مبتلا رہتی لیکن سرجری ہو یا دیگر ادویات کا استعمال یہ درد آسانی سے نہیں جاتا اور پھر لوٹ آتا ہے تاہم اب کی گئی ایک نئی تحقیق میں ڈاکٹرز کا کہنا ہے کہ کمر کی تکلیف کے لیے سرجری کی ضرورت نہیں بلکہ فزیو تھراپی کے ذریعے اس تکلیف پر قابو پایا جاسکتا ہے۔
امریکا میں کی جانے والی تحقیق میں کہا گیا ہے کہ فزیو تھراپی سے کمرکے درد کا باعث بننے والے عنصر”لمبراسپائنل اسٹینوسیس” کو بہتر بنایا جاسکتا ہے اوردلچسپ بات یہ ہے کہ یہی کام سرجری سے بھی کیا جاتا ہے لیکن فزیو تھراپی میں سرجری کے مقابلے میں زندگی کو لاحق خطرات کم ہوتے ہیں۔
لمبر اسپائنل اسٹینوسیس کمر کے نچلے حصے، ہپس اور ٹانگوں کو س±ن کرتا ہے اور یہی شدید درد کا بھی باعث بنتا ہےاور کبھی کبھی تو مریض کے لیے ایک قدم بھی دشوار ہوجاتا ہے جسے شیٹیکا یا درد عرق النسا بھی کہا جاتا ہے۔ ڈاکٹرز کا کہنا ہے کہ جب کمر میں موجود شریانیں دباو¿ کا شکار ہوتی ہیں تو اسپائنل کورڈ کی گزرگاہ پر موجود اسپائنل کینال سکڑ جاتا ہے جبکہ اس میں موجود ڈسکس، پٹھے او ہڈیوں کو جوڑنے والا مواد عمر بڑھنے کے ساتھ کمزور پڑنے لگتا ہے اور کمر کا درد بڑھ جاتا ہے جبکہ کمر کا درد زیادہ پیدل چلنے اور کھڑا رہنے والوں میں ہوتا ہے اور جب وہ آگے کی جانب جھک کر کوئی ورزش کرتے ہیں تو درد میں کمی محسوس کرتے ہیں۔
تحقیق کے دوران 2000 سے لے کر 2005 کے درمیان 481 مریضوں کا انتخاب کیا گیا ان میں سے صرف 169 نے اس ریسرچ میں شامل ہونے کا فیصلہ کیا جس میں سے 87 مریضوں کی سرجری جبکہ 82 مریضوں کا فزیو تھراپی کے ذریعے علاج کیا گیا، فزیو تھراپی والے مریضوں کو 6 ہفتوں تک ہفتے میں 2 بار اسی عمل سے گزارا گیا اس دوران انہیں اجازت دی گئی کہ وہ اس دوران کسی بھی مرحلے پر سرجری کرا سکتے ہیں، ڈاکٹرز کا کہنا ہے کہ تحقیق کے اختتام پر ان مریضوں کے درد میں اتنی ہی کمی واقع ہوئی جتنی سرجری کرنے والے مریضوں میں۔ڈاکٹر جیفری کاٹزکا کہنا ہے کہ اگر سرجری سے قبل فزیو تھراپی کرانے میں کوئی حرج نہیں کیوں کہ سرجری میں بہرحال خطرہ موجود ہوتا ہے جب کہ اس کے مقابلے میں فزیو تھراپی ایک محفوظ طریقہ علاج ہے۔