کراچی…… وزیراعظم نواز شریف کا کہنا ہے کہ نیشنل ایکشن پلان پر تمام سیاسی جماعتیں متحد ہیں اور اس میں ناکامی کا کوئی آپشن نہیں۔

وزیراعظم نواز شریف پیر کو کراچی پہنچے جہاں انھوں نے قومی ایکشن پلان پر عملدرآمد کے حوالے سے اہم اجلاس کی صدارت کی۔

گورنر ہاؤس میں ہونے والے صوبائی ایپکس کمیٹی کے اجلاس میں آرمی چیف جنرل راحیل شریف، کور کمانڈر کراچی لیفٹیننٹ جنرل نوید مختار، ڈی جی رینجرز میجر جنرل بلال اکبر، صوبائی کابینہ اور قانون نافذ کرنے والے اداروں کے افسران بھی شریک ہوئے۔

اس موقع پر وزیراعظم کا کہنا تھا کہ سانحہ پشاور کے بعد قومی لائحہ عمل کا اعلان کیا گیا اور اسی سلسلے میں 21 ویں آئینی ترمیم اورآرمی ایکٹ میں بھی ترمیم کی گئی۔

ان کا کہنا تھا کہ عوام کو قومی ایکشن پلان سے مثبت نتائج کی امیدیں ہیں۔

دہشت گردی کی لعنت کو ملک سے ہمیشہ کے لیے ختم کرنے کے عزم کا اظہار کرتے ہوئے وزیراعظم نواز شریف کا کہنا تھا کہ دہشت گردی کے خلاف جنگ جیتنا ہوگی۔

وزیراعظم نواز شریف نے سانحہ بلدیہ فیکٹری میں آتشزدگی کو ایک سنگین واقعہ قرار دیا۔

اس موقع پر آرمی چیف جنرل راحیل شریف کا کہنا تھا کہ پورے ملک کی خوشحالی کراچی کے امن سے منسلک ہے اور بلا امتیاز کارروائی سے مجرموں کا خاتمہ ممکن ہے۔