لاہور: بھارتی فوج نے درندگی کی تمام حدیں پارکردیں اور فلیگ میٹنگ کے بہانے پاکستان رینجرز کے مقامی کمانڈرز کو بلا کر ان پر فائرنگ کردی جس کے نتیجے میں 2 جوان شہید ہوگئے۔
بھارت کی جانب سے گزشتہ روز مقامی کمانڈرز کی فلیگ میٹنگ بلائی گئی تھی جس میں شرکت کے لئے پاکستان رینجرز کے 2 جوان نائیک ریاض اور صفدر علی شکر گڑھ سیکٹر سے بھارتی حدود میں داخل ہورہے تھے کہ اس دوران بھارتی فوج نے ان پراندھا دھند فائرنگ کردی جس کے نتیجے میں دونوں جوان شدید زخمی ہوگئے۔ دشمن فوج کی فائرنگ کے بعد پاکستان رینجرز کی جانب سے بھرپور جوابی کارروائی کی گئی جب کہ درندگی کا مظاہرہ کرتے ہوئے بھارتی فوج نے زخمی جوانوں تک ایمبولینس کی رسائی بھی نہیں ہونے دی جس کے نتیجے میں دونوں اہلکار زخموں کی تاب نہ لاتے ہوئے شہید ہوگئے۔
واضح رہے کہ بھارتی فوج کی جانب سے شکر گڑھ سیکٹر پر کئی روز سے ورکنگ باؤنڈری کی خلاف ورزی کی جاری ہے جب کہ بھارت جانب سے رواں ماہ بھی کئی بار پاکستانی حدود میں بلااشتعال فائرنگ کی گئی۔
