اسلام آباد (این این آئی)بینک الفلاح سیکورٹیز کے سابق سی ای او و معروف پاکستانی ماڈل نادیہ حسین کے خاوند عاطف محمد خان کو 54کروڑ روپے خرد برد کرنے کے الزام میں گرفتار کرلیا گیا۔ذرائع کے مطابق ایف آئی اے کارپوریٹ کرائم سرکل نے بینک الفلاح سیکورٹیز بورڈ آف ڈائریکٹرز کی شکایت پر تحقیقات کے بعد سابق سی ای اوبینک الفلاح سیکورٹیز عاطف محمد خان کو 54کروڑ روپے کی خرد برد کے الزام میں گرفتار کرلیا۔

رپورٹ کے مطابق ملزم کارپوریٹ فنانشل فراڈ کے ذریعے کمپنی فنڈز کی خرد برد میں ملوث ہے، ملزم نے 80ملین کے کمپنی فنڈز کو ذاتی ٹریڈنگ کے لئے استعمال کیا۔رپورٹ کے مطابق ملزم نے تھرڈ پارٹی کے ذریعے 654ملین غیر قانونی طور پر ایکوائر کئے اور کمپنی فنڈز سے انہیں ہائی مارک اپ کے ساتھ ادائیگی کی۔رپورٹ میں کہا گیا کہ ملزم کو سابق سی ایف او فیصل شیخ اور امتیاز احمد نے فراڈ میں سہولیات فراہم کیں۔