ممبئی (این این آئی)کرنی سینا نے سلمان خان کو جان سے مارنے کی دھمکیاں دینے والے لارنس بشنوئی کو جیل میں قتل کرنیوالے کو ایک کروڑ انعام دینے کا اعلان کردیا۔بھارتی میڈیا کے مطابق چھتریہ کرنی سینا نامی تنظیم کے صدر راج شیکھاوت نے ایکس پر جاری ویڈیو بیان میں کہا کہ جیل میں بند لارنس بشنوئی کو جو بھی پولیس اہلکار انکانٹر کرے گا اسے کرنی سینا کی جانب سے ایک کروڑ گیارہ لاکھ سے زائد کی رقم انعام میں دی جائے گی۔
کرنی سینا کے راج شیکھاوت کی لارنس بشنوئی سے دشمنی کی وجہ اپنی تنظیم کے سابق صدر سکھدیو سنگھ گوگامیڈی کا قتل ہے۔کرنی سینا کے صدر سکھدیو سنگھ گوگامیڈی کو 5دسمبر 2023ء میں ان کے گھر پر فائرنگ کرکے قتل کردیا گیا تھا جس کا الزام کرنی سینا نے لارنس بشنوئی گینگ پر لگاتے ہوئے دعویٰ کیا تھا کہ لارنس بشنوئی کے ساتھیوں نے گھر میں داخل ہوکر گوگامیڈی کو قتل کیا ہے۔واقعے سے قبل لارنس بشنوئی گینگ سے منسلک گولڈی برار نے اپنے ایک انٹرویو میں گوگامیڈی کو جان سے مارنے کی دھمکی دی تھی۔
