ممبئی (این این آئی)اداکارہ مہوش حیات اور بھارت ریپر ہنی سنگھ نے ایک ساتھ نئے گانے کا اعلان کرکے سب کی توجہ حاصل کرلی ہے۔ہنی سنگھ اور مہوش حیات کی ایک ویڈیو سوشل میڈیا پر وائرل ہورہی ہے جس میں ہنی سنگھ پنجابی ریپ گاتے ہوئے مہوش حیات کی طرف اشارہ کرکے سہیلی کراچی کہہ رہے ہیں اور ان کے چھیڑنے پر مہوش حیات شرما رہی ہیں۔ویڈیو کیپشن میں دونوں کے آبائی شہر کا ذکر کرتے ہوئے لکھا گیا ہے کہ کرمپورا کا کراچی سے تعلق، کچھ بہت خاص آنے والا ہے۔
ہنی سنگھ بھارت کی ہپ ہوپ اور ریپ میوزک انڈسٹری کا مشہور نام ہے، جنھوں نے بالی ووڈ کو لنگی ڈانس، پارٹی آل نائٹ، آتا ماجی سٹک لی اور یار نہ ملے جیسے سپر ہٹ گانے دیئے ہیں۔ہنی سنگھ انڈسٹری میں دوبارہ آمد پر پہلے سے زیادہ پذیرائی حاصل کرنے کیلئے مختلف حربے آزما رہے ہیں۔ ہنی سنگھ رواں سال مہوش حیات کیساتھ بھی نظر آئے ،اب انہوں نے انسٹاگرام پر ایک ویڈیو شیئر کرکے اس بات کا اعلان کردیا ہے کہ دونوں جلد کچھ دھماکے دار کرنے والے ہیں۔قبل ازیں مہوش حیات بھی یہ انکشاف کرچکی ہیں کہ وہ ہنی سنگھ کے نئے ٹریک کلر میں کام کررہی ہیں۔
