ممبئی (این این آئی)بالی ووڈ کے کنگ خان، شاہ رخ کی اہلیہ گوری خان جو پیشے کے اعتبار سے انٹریئر ڈیزائنر ہیں انہوں نے اپنے پیشہ ورانہ زندگی کے آغاز کے حوالے سے اپنی عمر کے بارے میں شاہ رخ خان کی تصحیح کر دی۔
گوری خان کی کتاب”مائی لائف ان ڈیزائن” کی تقریب رونمائی پر خطاب کے دوران شاہ رخ خان نے بتایا کہ گوری نے کس طرح کام شروع کیا۔ اس موقع پر گفتگو کرتے ہوئے شاہ رخ خان نے انکشاف کیا کہ انہوں نے گوری کو مدد کی پیشکش کی لیکن انہوں نے اس کو قبول نہیں کیا۔انہوں نے کہا کہ وہ تمام نوجوان اور وہ لوگ جو اپنی زندگی میں تخلیق کے حوالے سے خواب دیکھتے ہیں جو پورے نہیں ہوپاتے تو اس سے کوئی فرق نہیں پڑتا، آپ کسی بھی عمر میں اسے شروع کرسکتے ہیں۔انکا مزید کہنا تھا کہ میرا خیال ہے کہ گوری نے 45 سال کے وسط میں اپنا کام شروع کیا، یہ کہتے ہوئے جیسے ہی شاہ رخ نے گوری کی جانب دیکھا تو انہوں نے اپنی عمر پر شاہ رخ کی غلطی درست کرتے ہوئے وضاحت کی کہ وہ 45 نہیں بلکہ چالیس سال کی تھیں۔ جس پر بالی ووڈ سپر اسٹار نے پرمزاح انداز میں کہا کہ”او صرف 40!!” اور پھر کہا کہ گوری ابھی 37 برس کی ہیں، ہمارے خاندان میں عمریں پیچھے کی جانب جاتی ہیں۔
