لاہور( این این آئی) لالی ووڈ سٹار میرا خاتون اینکر سے بغیر کسی وجہ کے الجھ پڑیں اور اٹھ کر چلی گئیں ، ناظرین نے اداکارہ کے رویے پر حیرانی کا اظہار کرتے ہوئے کہا ہے کہ اداکارہ کا ناروا رویہ قابل مذمت ہے ۔ تفصیلات کے مطابق نجی ٹی وی چینل کی جانب سے اداکارہ میرا کو آرٹ کونسل کو امداد کیلئے درخواست دینے پر مطالبات سے آگاہی کیلئے لائیو کال پر لیا گیا ۔

میرا نے کہا کہ کورونا وائرس کی وجہ سے میں بہت مشکلات کا شکار ہوں اس لئے درخواست دی ہے اور مجھے نہیں معلوم کہ کتنی امداد ملتی ہے۔ جب خاتون اینکر نے سوال کیا کہ آپ نے درخواست میں ذاتی گھر اور پلازے کا بھی ذکر کیا ہے جس پر میرا نے کہا کہ آپ نے درخواست اور کاغذات نہیں دیکھے آپ میرے گھر کو فروخت کرا دیں ۔ خاتون اینکر نے میرا سے مالی مشکلات پر ہمدردی کا اظہار کرتے ہوئے سوال کیا کیا آپ کو یقین ہے کہ حکومت آپ کی درخواست کو منظور کرے گی یا آپ وزیر اعظم سے اپیل کرتی ہیں جس پر میرا غصے میں آگئیں اور کہا کہ آپ میری بات کو متنازعہ بنا رہی ہیں، آپ مجھ سے مقابلہ کرنے کی کوشش نہ کریں میں آپ سے بہت زیادہ با صلاحیت ہوں ، آپ ہار جائیں گی ۔ میں چیدہ چیدہ لوگوں کو انٹر ویو دیتی ہوں اور آپ اس قابل ہی نہیں کہ آپ کو انٹر ویو دیا جائے اوروہاں سے چلی گئیں۔خاتون اینکر نے میرا کے ناروا رویے کے باوجود انتہائی تحمل کا مظاہرہ کرتے ہوئے کہا کہ میرا پاکستان کی سٹار ہیں اگر میری کسی بات سے ان کی دل آزاری ہوئی ہے تو میں معذرت خواہ ہوں ۔اداکارہ میرا نے آرٹ کونسل میں جمع کرائی گئی درخواست میں اپنی عمر 42سالہ جبکہ فلم میں 25سال کا تجربہ تحریر کیا ہے۔