اسلام آباد(مانیٹرنگ ڈیسک)جودھ پور کی سیشن عدالت نے سلمان خان کی ضمانت منظورکر لی، بالی ووڈ سٹار دو راتیں جودھ پور جیل میں گزار چکے ہیں۔ تفصیلات کے مطابق جودھ پور کی سیشن عدالت نے بالی ووڈ سٹار اور دبنگ خان کے نام سے مشہور سلمان خان کی ضمانت منظور کر لی ہے۔ بھارتی میڈیا کے مطابق بالی ووڈ سٹار سلمان خان کو جودھ پور کی عدالت نے 20سال قبل نایاب کالے ہرن کے غیر قانونی شکار پر سلمان خان کو مجرم قرار دیتے ہوئے5سال قید اور 10ہزار جرمانے
کی سزا سنائی تھی جس کے بعد سلمان خان کو جودھ پور جیل بھیج دیا گیا تھا۔ سلمان خان کے وکیل مہیش بورا نے جودھ پور کی سیشن عدالت میں اپنے موکل سلمان خان کی درخواست ضمانت دائر کی تھی جس پر سیشن جج نے فیصلہ محفوظ کر لیا تھا ۔ یہ محفوظ فیصلہ آج سنادیا گیا ہے اور عدالت نے سلمان خان کی درخواست ضمانت منظور کر لی ہے۔ سلمان خان کی ضمانت منظوری کی خبر آتے ہی بالی ووڈ میں بھی ہلچل مچ گئی ہے اور دبنگ خان کے قریبی اور دوستوں نے اس خبر پر خوشی کا اظہار کیا ہے۔
