اسلام آباد (نیوز ڈیسک)1500 روپے کے قومی انعامی بانڈ رکھنے والوں کے لیے خوشخبری سامنے آگئی ہے، کیونکہ حالیہ قرعہ اندازی کے نتائج جاری کر دیے گئے ہیں اور مکمل فہرست عوام کی سہولت کے لیے آن لائن بھی دستیاب کر دی گئی ہے۔

تفصیلات کے مطابق 15 مئی کو سیالکوٹ میں نیشنل سیونگز سینٹر کے زیرِ اہتمام 1500 روپے والے انعامی بانڈ کی 106ویں قرعہ اندازی منعقد ہوئی، جس میں مختلف انعامات جیتنے والے خوش نصیب افراد کے نمبرز کا اعلان کیا گیا۔اس قرعہ اندازی میں پہلا انعام 30 لاکھ روپے رکھا گیا تھا، جبکہ دوسرے انعام کی مالیت 10 لاکھ روپے فی کس مقرر کی گئی۔ اس کے علاوہ 1696 افراد کو تیسرے انعام کے طور پر 18 ہزار 500 روپے دیے جائیں گے۔نتائج کے مطابق بانڈ نمبر 024132 پہلے انعام کا حقدار قرار پایا۔ اسی طرح 026284، 355420 اور 407321 وہ تین نمبرز ہیں جنہوں نے 10،10 لاکھ روپے کا دوسرا انعام حاصل کیا۔کامیاب امیدوار اپنے اصل پرائز بانڈ اور قومی شناختی کارڈ کے ہمراہ اسٹیٹ بینک کے متعلقہ دفاتر، نیشنل سیونگز سینٹرز یا مقررہ کمرشل بینکوں سے انعامی رقم وصول کر سکتے ہیں۔

واضح رہے کہ پاکستان میں پرائز بانڈز کو محفوظ سرمایہ کاری تصور کیا جاتا ہے کیونکہ سرمایہ کار کی اصل رقم برقرار رہتی ہے، جبکہ مختلف قرعہ اندازیوں میں انعام حاصل کرنے کا موقع بھی ملتا رہتا ہے۔ شہری شناختی کارڈ کی نقل کے ساتھ مجاز بینک یا نیشنل سیونگز کے دفاتر سے یہ بانڈ خرید سکتے ہیں۔