کراچی (این این آئی) قومی ایئر لائن پی آئی اے کو برطانیہ کے لیے براہ راست پروازوں کی اجازت مل گئی ہے اس بارے میں برطانیہ کے ڈپارٹمنٹ آف ٹرانسپورٹ نے قومی ایئر لائن کے سی ای او کے نام اجازت نامہ جاری کیا ہے جس کے مطابق قومی ایئر لائن کو پانچ سال بعد کارگو فلائٹس چلانے کی مستقل اجازت مل گئی۔ترجمان پی آئی اے کے مطابق قومی ایئر لائن کو کارگو فلائٹس کے بعد برطانیہ کے لیے مسافر بردار پروازیں چلانے کی اجازت بھی مل گئی ہے۔
برطانوی ادارے کی جانب سے 23 ستمبر کو جاری ہونے والے خط کے مطابق قومی ایئر لائن کو کارگو پروازوں کی اجازت اسلام آباد، لاہور اور کراچی ایئر پورٹس سے برطانیہ کے لیے دی گئی ہے، کارگو فلائٹس کا اجازت نامہ 18 اگست 2030 تک کے لیے ہے۔جاری خط کے مطابق اسلام آباد اور لاہور سے برطانیہ جانے والے سامان کی چیکنگ کیلئے EDS مشین کا استعمال نہیں ہوگا لیکن برطانوی سیکیورٹی حکام قومی ایئر لائن کے طریقہ کار کا اچانک معائنہ کر سکیں گے۔کئی سالوں کے بعد اب قومی ایئر لائن برطانیہ کو براہ راست کارگو بھیج سکے گی، تاہم قومی ایئر لائن کے فضائی بیڑے میں اس وقت کوئی کارگو طیارہ موجود نہیں ہے۔ترجمان پی آئی اے کے مطابق پی آئی اے کو برطانیہ کے لیے تھرڈ کنٹری آپریٹر (ٹی سی او) کی باضابطہ منظوری حاصل ہوگئی ہے،پی آئی اے مسافروں کے لیے آئندہ ماہ سے برطانیہ کے لیے براہ راست فضائی آپریشن کا آغاز کرے گا۔پہلے مرحلے میں مانچسٹر کی پروازیں چلائی جائیں گی، جس کے بعد برمنگھم اور لندن کو بھی نیٹ ورک میں شامل کیا جائے گا۔
اس حوالے سے گزشتہ روز برطانوی محکمہ ٹرانسپورٹ کی جانب سے باقاعدہ طور پر پی آئی اے کو آگاہ کر دیا گیا ہے۔ترجمان پی آئی اے کے مطابق گزشتہ روز ہی برطانوی محکمہ ٹرانسپورٹ نے پی آئی اے سیکیورٹی اور کارگو کو پانچ سال کے لیے ACC3 سرٹیفکیٹ بھی جاری کیا ہے۔بین الاقوامی ہوابازی کے اداروں کی جانب سے جاری کردہ یہ سرٹیفکیٹس پی آئی اے کے فضائی آپریشنز اور سیفٹی پر مکمل اعتماد کا مظہر ہیں۔واضح رہے کہ سابقہ حکومت کے وزیر ہوا بازی غلام سرور خان کے پاکستانی پائلٹس کے جعلی لائسنس سے متعلق بیان کے بعد برطانیہ اور یورپی یونین نے جولائی 2020 سے قومی ایئر لائن کی پروازوں پر پابندی عائد کردی تھی۔
