اسلام آباد (این این آئی)حکومت نے اعلی کارکردگی والے افسران کو بونس اور ترقیاں دینے کا پلان تیار کرلیا۔ذرائع کے مطابق نائب وزیراعظم و وزیر خارجہ سینیٹر اسحاق ڈار کی سربراہی میں قائم کمیٹی نے 5سب ورکنگ گروپ تشکیل دیئے گئے ہیں ۔ورکنگ گروپس کو سفارشات مرتب کرنے کا ٹاسک دے دیا گیا ہے جو وزیراعظم کے دیئے گئے قواعد و ضوابط کی روشنی میں سفارشات دیں گے۔ذرائع کے مطابق حکومت کا اعلی کارکردگی والے افسران کو بونس اور ترقیاں دینے کا پلان ہے، کارکردگی جائزہ رپورٹس سے منسلک سسٹم سے تجویز کیا جائے گا۔
ای آفس کو مینجمنٹ انفارمیشن سسٹم میں اپ گریڈ کرنے کا پلان تجویز کیا جائے گا، ڈیش بورڈ اور ڈیٹا پر مبنی فیصلہ سازی کیلئے سفارشات دی جائیں گی۔ذرائع کے مطابق شفافیت، جوابدہی، محکموں کے درمیان کوآرڈنیشن سے متعلق سفارشات تیار کی جائیں گی، ای آفس کو مربوط بنانے کیلئے سیکرٹریٹ انسٹرکشنز سے متعلق ری انجینئرڈ فریم ورک تجویز کیا جائے گا۔ ذرائع کے مطابق پراسیس کو اسٹریم لائن، آٹومیشن اور صلاحیت بڑھانے کیلئے تجاویز تیار کی جائیں گی، نئی ٹیکنالوجیز، طریقہ کار کو بغیر کسی رکاوٹ اپنانے کیلئے تجاویز تیار کی جائیں گی۔ذرائع کے مطابق مینجمنٹ سروس ونگ کو فعال ایچ آر یونٹ میں بدلنے کا ماڈل تجویز کیا جائے گا، افرادی قوت، اسٹاف کے عدم توازن اور ڈیٹا کی بنیاد پر تجاویز تیار کی جائیں گی۔پہلا سب ورکنگ گروپ عارف سعید کی جبکہ دوسرا سب ورکنگ گروپ محمد علی کی سربراہی میں سفارشات دیگا۔ذرائع کے مطابق تیسرا ورکنگ گروپ ناصر کھوسہ، چوتھا گروپ سلمان احمد اور پانچواں ورکنگ گروپ جہانزیب خان کی سربراہی میں سفارشات مرتب کرے گا۔
