لاہور(این این آئی)پنجاب کے سابق نگران وزیر معدنیات ابراہیم حسن مراد نے دعویٰ کیا ہے کہ اٹک میں 28لاکھ تولہ سونے کے ذخائر دریافت ہوئے ہیں جس کی مالیت 800ارب روپے ہے،امریکی ڈالر میں ذخائر کی مالیت 2ارب 87کروڑ ڈالر بنتی ہے۔

سوشل میڈیا پر جاری بیان میں سابق صوبائی نگران وزیر معدنیات نے بتایا کہ سونے کے یہ ذخائر اٹک میں 32کلومیٹر کی پٹی پر دریافت ہوئے ہیں۔ابراہیم حسن مراد کے مطابق جیولوجیکل سروے آف پاکستان نے اس انکشاف کی تصدیق کی ہے جس سے پنجاب کے قدرتی وسائل کی زبردست صلاحیت اجاگر ہوئی ہے۔ انہوںنے کہاکہ اس سلسلے میں جیولوجیکل سروے آف پاکستان نے 127مقامات سے نمونے اکٹھے کیے۔ابراہیم حسن مراد نے کہ یہ سنگ میل پاکستان کے معدنی وسائل کو دریافت کرنے کی جانب ایک اہم قدم ہے، جو معاشی بحالی اور آئندہ نسلوں کیلئے نئے مواقع پیدا کرنے کی راہ ہموار کریگا۔