اسلام آباد(این این آئی)حکومت نے پیٹرول کی قیمت میں فی لیٹر 26روپے اور ہائی اسپیڈڈیزل کی فی لیٹرقیمت میں17روپے کا اضافہ کردیا۔فنانس ڈویژن سے جاری اعلامیے میں کہاگیا کہ بین الاقوامی مارکیٹ میں تیل کی بڑھتی ہوئی قیمتوں کے پیش نظر حکومت نے پیٹرولیم مصنوعات کی موجودہ قیمتوں میں ردوبدل کا فیصلہ کیا ہے۔اعلامیے میں کہا گیاکہ پیٹرولیم مصنوعات کی نئی قیمتوں کو اطلاق رات 12بجے سے ہوگیاہے۔

حکومت کی جانب سے جاری اعلامیے کے مطابق پیٹرول کی قیمت فی لیٹر26روپے 2پیسے اضافے کے بعد نئی قیمت 331روپے 38پیسے ہوگئی ہے۔ہائی اسپیڈ ڈیزل کی فی لیٹر قیمت میں17روپے 34فیصد اضافہ کردیا گیا ہے اور نئی قیمت 329روپے 18پیسے ہوگئی ہے۔اس سے قبل گزشتہ روز روپے کی قدر میں کمی اور تیل کی قیمتوں میں عالمی سطح پر اضافے کی وجہ سے رواں ہفتے کے آخر میں پیٹرولیم مصنوعات کی قیمتوں میں ایک بار پھر اضافے کا خدشہ ظاہر کیا گیا تھا۔