اسلام آباد(مانیٹرنگ ڈیسک)آج صبح جب مارکیٹ کا آغاز ہوا تو کاروبار کے ابتدا میں ہی امریکی ڈالر 13پیسے سستا ہوا لیکن یہ سلسلہ زیادہ دیر برقرار نہ رہ سکا، سٹیٹ بینک کے ٹوئٹر پر جاری اعداد و شمار

کے مطابق مارکیٹ بندہونے سے پہلے آج ڈالر کی قیمت میں کل ایک پیسے کی کمی ہوئی ، گزشتہ روز ڈالر کا ریٹ 159.28روپے پر بند ہوا تھا لیکن آج 159.27روپے پر بند ہوا، دوسری جانب مقامی صرافہ مارکیٹوں میں سونے کی فی تولہ قیمت مزید200روپے کی کمی سے ایک لاکھ 10ہزار300روپے کی سطح پر آگئی۔صراف اینڈ جیولرز ایسوسی ایشن کے مطابق گزشتہ روز عالمی مارکیٹ میں سونے کی فی اونس قیمت 6ڈالر کی کمی سے1809ڈالر کی سطح پر آگئی جس کے زیر اثر مقامی صرافہ مارکیٹوں میں فی تولہ سونے کی قیمت200روپے کی کمی سے1لاکھ 10ہزار300روپے ہوگئی جب کہ دس گرام سونے کی قیمت172روپے کی کمی سے94ہزار564روپے ہوگئی۔چاندی کی فی تولہ قیمت 1180روپے مستحکم رہی۔