کراچی(این این آئی)بین الاقوامی ریٹنگ ایجنسی فچ نے کہاہے کہ کرونا وائرس کی وبا اور عالمی معاشی سست روی کی وجہ سے پاکستان اور دیگر ایشیائی ممالک میں ترسیلات زر دبائو کا شکار رہیں گی اور کرنٹ اکائونٹ خسارہ بڑھ جائے گا۔اپنی تازہ ترین رپورٹ میںریٹنگ ایجنسی فچ نے کہاکہ
بیرون ملک مقیم کارکنان کی جانب سے ترسیلات زر میں ممکنہ کمی اور اس کے نتیجے میں 2020 کے دوسرے نصف میں بیرونی فنانسنگ کی زیادہ ضرورت کریڈٹ ریٹنگ پر اثرانداز ہوسکتی ہے۔فچ کی جاری کردہ رپورٹ کے مطابق جون اور جولائی میں زیادہ بلند ترین ترسیلات زرکی وجہ عارضی عوامل تھے۔ کووڈ 19 کی وجہ سے بیرون ممالک میں بے شمار لوگوں کے ملازمتوں سے محروم ہونے ، آمدن میں کمی اور تیل کے نرخوں کے عالمی بحران کی وجہ سے ترسیلاتِ زر میں کمی متوقع ہے۔فچ کی رپورٹ کے مطابق پاکستان، بھارت، بنگلہ دیش اور سری لنکا میں ترسیلات زر دبائو کا شکار رہیں گی، رواں ششماہی ایشیا پیسیفک ممالک کی ترسیلات زر میں 12 فیصد کمی آئے گی۔ریٹنگ ایجنسی کے مطابق فلپائن، پاکستان، سری لنکا اور بنگلہ دیش کا کرنٹ اکائونٹ خسارہ بڑھنے کا امکان ہے، پاکستان، سری لنکا اور بنگلہ دیش کا کرنٹ اکائونٹ خسارہ جی ڈی پی کے 7 سے 10 فیصد تک متوقع ہے۔
