کراچی(این این آئی)حکومت کا شارٹ ٹرم قرضوں پربھی انحصاربڑھنے لگا، قرضوں کی شرح خطے میں دوسری بلند ترین شرح پرپہنچ گئی۔انسٹی ٹیوٹ آف انٹرنیشنل فنانس کی رپورٹ کے مطابق سال 2019 کی پہلی سہ ماہی کے دوران دنیا بھر کے مجموعی قرضے30کھرب ڈالراضافے سے2 ہزار460 کھرب ڈالرتک پہنچ گئے، ایشیاء کی ایمرجنگ مارکیٹس میں پاکستان کے قرضے جی ڈی پی کے 73.4 فیصد تک پہنچ گئے، جوخطے میں سنگاپورکے بعد دوسری بلند ترین شرح ہے۔پاکستان کے
حکومتی قرضوں کی شرح گزشتہ سال68.3 فیصد تھی،سنگاپور حکومت کے قرضوں کی شرح 112.6فیصدہے جبکہ تیسرے نمبرپربھارت ہے جس کے قرضوں کی شرح67فیصد ہے تاہم بھارت کی قرضوں کاتناسب سال کے دوران پہلے سے کم ہوا ہے۔رپورٹ کے مطابق پاکستان کے شارٹ ٹرم قرضوں کا تناسب تقریبا60 فیصد ہوچکا ہے جو دنیا میں چوتھے نمبر پر بلند ترین شرح ہے، دنیامیں حکومتی قرضوں کی جی ڈی پی کے تناسب سے سب سے زیادہ شرح جاپان کی ہے،جوسال کی پہلی سہ ماہی کے اختتام پر226.4فیصدتک پہنچ گئی۔
