اسلام آباد(آئی این پی )سابق وفاقی وزیر خزانہ سینیٹر اسحاق ڈار نے کہا ہے کہ ہماری معیشت کو غیر مستحکم کیا گیا ہے، اس معاملے پر ہمیں اندرونی اور بیرونی سازشوں کا سامنا ہے ، ہماری کرنسی مستحکم تھی اسے ہلانے کی ضرورت نہیں تھی ، میں نے 12اپریل کو وزیراعظم شاہد خاقان عباسی کو نوٹ لکھ کر بھیجا اور ان کو ملکی معیشت سے متعلق اپنے تحفظات سے آگاہ کیا ، میں مسلسل اپنی میڈیکل رپورٹس عدالت کو بھیجتا رہا ہوں

۔منگل کو نجی ٹی وی سے گفتگو کرتے ہوئے سابق وفاقی وزیر خزانہ سینیٹر اسحاق ڈار نے کہا کہ ساری دنیا ہماری معیشت کو سراہ رہی تھی، بین الاقوامی ادارے ہماری معیشت کی بہتری کی بات کر رہے تھے ، ہماری کرنسی مستحکم تھی اسے ہلانے کی ضرورت نہیں تھی ، کرنسی کی قدر میں کمی سے کتنے ڈالر ملک میں آگئے ہیں ؟اس معاملے پر ہمیں اندرونی اور بیرونی سازشوں کا سامنا ہے ، ہماری معیشت کو غیر مستحکم کیا گیا ہے ، آج غربت 64فیصد سے کم ہو کر 30فیصد پر آگئی ہے ، ہم جی20ممالک میں شامل ہونے جا رہے تھے ، اس مرتبہ بھی ہم کوئی خاص ٹیکس جمع نہیں کر پائے ۔انہوں نے کہا ہے کہ میرا34سال کا ٹیکس ریکارڈ عدالت میں جمع ہے ، میں نے اپنے چار سال کے دوروزارت میں ملکی معیشت بہتر کرنے میں اہم کردارادا کیا ۔ میں نے 12اپریل کو وزیراعظم شاہد خاقان عباسی کو نوٹ لکھ کر بھیجا اور ان کو ملکی معیشت سے متعلق اپنے تحفظات سے آگاہ کیا ۔اسحاق ڈار نے کہا ہے کہ میرے ساتھ دل کا مسئلہ ہے ، جتنی جلدی ہو سکے وطن واپس آنا چاہتا ہوں ، 26اپریل کو میری ڈاکٹر کے ساتھ اپواٹمنٹ ہے ، ہوسکتا ہے کہ مجھے وطن واپسی کی اجازت مل جائے ، میں مسلسل اپنی میڈیکل رپورٹس عدالت کو بھیجتا رہا ہوں ۔