پشاور(این این آئی)صوبائی وزیر توانائی و برقیات اور تعلیم محمد عاطف خان نے ملکی و غیر ملکی سرمایہ کاروں کوخیبر پختونخوا کے مختلف شعبوں خصوصاً پن بجلی کے شعبے میں سر مایہ کاری کی دعوت دیتے ہوئے کہا ہے کہ صوبہ ہر قسم کے بیش بہا قدرتی وسائل سے مالا مال ہے اور تمام شعبوں میں سرمایہ کاری کے وسیع مواقع موجود ہیں ۔سرمایہ کاری کے لئے حالات سازگار ہونے کے ساتھ ساتھ صوبائی حکومت بھی اس معاملے میں مکمل تعاون فراہم کرنے میں انتہائی سنجیدہ ہے۔یہ دعوت انہوں نے پیر کے روز پشاور میں اطالوی وفد سے گفتگو کرتے ہوئے دی۔ اس موقع پر دوسروں کے علاوہ سیکرٹری توانائی نعیم خان اور سی ای او پیڈو اکبر ایو ب بھی موجود تھے۔
وفد کے ارکان کو انرجی اینڈ پاور سیکٹر میں سرکاری و نجی شعبے کے ذریعے جاری، نئے اور مجوزہ ہائیڈرو پاورپراجیکٹس کے بارے میں تفصیلی بریفنگ دی گئی اور اس شعبے میں سرمایہ کاری کے کثیر مواقع کے بارے میں بتایا گیا۔وفد کے ارکان نے اس میں انتہائی دلچسپی لی اور مکمل آگاہی حاصل کرنے کے لئے سوالات بھی کئے جن کے انہیں مفصل جوابات دئیے گئے۔وزیر توانائی نے کہا کہ صوبائی حکومت پہلے ہی سرکاری شعبے میں 514میگاواٹ کے منصوبوں کی نشاندہی کر چکی ہے جن میں سے 214میگاواٹ کے منصوبوں پر کام بھی شروع کر دیا گیا ہے جبکہ نجی شعبے کو بھی 2ارب ڈالرسرمایہ کاری کے 668میگاواٹ کے منصوبے آفر کئے گئے ہیں
جن کے لئے نجی شعبے کا رسپانس انتہائی حوصلہ افزا ہے۔ان کا کہنا تھاکہ جن منصوبوں کی سائیٹ کی نشاندہی کی گئی ہے اور فزیبلٹی بھی مکمل ہے انہیں اوپن بڈ کے ذریعے دیا جائے گا جبکہ سائیٹ کی نشاندہی اور فزیبلٹی کرنے والے کو پہلے آئیے اور پہلے پائیے کی بنیاد پر دیئے جائیں گے۔عاطف خان نے کہا کہ انرجی اینڈ پاور سیکٹرمیں پاور پرافٹ پر زیرو کارپوریٹ ٹیکس ہے اور نجی شعبے میں ٹرانسمیشن اور ڈسٹریبوشن کمپنی بھی بنائی جا سکتی ہے جسے حکومت پاکستان کی مکمل گارنٹی حاصل ہو گی۔انہوں نے مزید کہا کہ تھرمل کے مقابلے میں ہا ئیڈرو پاور بہت سستاہے اس لئے حکومت خیبر پختونخوا کی بھرپورتوجہ اس شعبے پر ہے اور سرمایہ کاروں کو راغب کرنے کے لئے پرکشش مراعات بھی آفر کی گئی ہیں۔
