کراچی(آن لائن)صوبہ سندھ میں ضلع سانگھڑ کے دریافتی کنویں سے گیس کے نئے ذخائر دریافت ہوئے ہیں۔ پاکستان پٹرولیم لمیٹڈ (پی پی ایل ) گمبٹ ساؤتھ بلاک میں65فیصد کاروباری حصہ داری کے ساتھ آپریٹر ہے جبکہ گورنمنٹ ہولڈنگز (پرائیویٹ ) لمیٹڈ اور ایشیا ریسورسز آئل لمیٹڈ کی ساجھے داری بالترتیب 25 اور 10فیصد ہے۔دریافتی کنوئیں ہادیX-1 A کی کھدائی کا آغاز5 فروری2016 کو ہوا جسے19 اپریل2016 کو4,020 میٹرزکی حتمی گہرائی تک پہنچایا گیا ۔وائر لائن لوگز کی بنیاد پرسمبر فارمیشن میں ہائیڈروکاربن رکھنے والے زونز کی نشاندہی کی گئی۔سمبر فارمیشن میں ابتدائی جانچ کے دوران تین دنوں میں کنوئیں کی سطح پر گیس کی اچھی مقدار حاصل ہوئی اور اندازے کے مطابق یہ ٹائٹ گیس زخیرہ نظر آتا ہے۔ٹائیٹ گیس کی موجودگی کی مزید تصدیق کے لئے فریک جاب انجام دی گئی۔فریک جاب کے بعد گیس کے بہاؤ میں نمایاں اضافہ ہوا۔ 32/64″ انچ چوک سائزپرابتدائی جانچ کے دوران یومیہ 0.85 Mmscf گیس حاصل ہوئی جس سے ہا دی X-1 A میں تجارتی مقاصد کے لئے گیس کی موجودگی کی تصدیق ہوئی۔فریک جاب سے یہ نتیجہ اخذ کیا گیا ہے کہ یہ ٹائیٹ گیس دریافت ہے، تاہم کنوئیں کی تکمیل کے بعد حاصل ہونے والی معلومات اور کھدائی و جانچ کے دوران حاصل ہونے والے ارضیاتی ، ارضی طبیعاتی اورانجینئرنگ ڈیٹا کے انضمام سے دریافت کے حجم اور تجارتی مقاصد میں استعمال کی تصدیق ہو سکے گی۔