اسلام آباد (نیوزڈیسک)پاکستانیوں کیلئے خوشخبری،دو نئے کنوﺅں سے گیس کی دریافت ،وفاقی وزیر پٹرولیم و قدرتی وسائل شاہد خاقان عباسی نے دعویٰ کیا ہے کہ دو نئے کنوﺅں سے گیس کی دریافت سے سپلائی میں بہتری آئے گی، مارچ تک 380 میٹرک ٹن ایل پی جی پلانٹ کو سسٹم میں لائیں گے، ایران پر عالمی پابندیاں ختم ہونے پر ہی پاکستان کی طرف سے گیس پائپ لائن منصوبے پر پیش رفت ہو گی، 2017ءمیں توانائی کی قلت کا مسئلہ کافی حد تک حل ہو جائے گا جمعرات کو وزیر مملکت جام کمال خان اور ایم ڈی او جی ڈی سی ایل کے ہمراہ میڈیا سے گفتگو کرتے ہوئے شاہد خاقان عباسی نے کہا کہ او جی ڈی سی ایل نے رواں سال ریکارڈ 31 کنویں کھودنے کا پروگرام بنایا ہے۔ سسٹم میں نئی گیس کم سے کم وقت میں شامل ہو جائے گی، نئے دریافت ہونے والے ذخائر سے جلد گیس سسٹم میں شامل ہو جائے گی۔ انہوں نے کہا کہ پاکستان کے تمام شہریوں کو گیس کی فراہمی پوری کرنے کیلئے کوشش کر رہے ہیں۔ شاہد خاقان عباسی نے کہا کہ ہر کام میں چیلنجز آتے ہیں اور ہم نے گیس کے معاملے کو حل کرنے کی کوششیں کی ہیں، او جی ڈی سی ایل کی کارکردگی سے مطمئن ہیں، شیل گیس کے حوالے سے کام جاری ہے، دو مقامات پر گیس کی نئی دریافت سے گیس کی قلت میں کمی ہو گی، گیس کو جلد سے جلد نظام میں شامل کرنے کی کوشش کر رہے ہیں۔ انہوں نے بتایا کہ پنجاب میں ڈیمانڈ کے مطابق صرف 60 فیصد گیس موجود ہے، گیس کو ٹیل پوائنٹ تک پہنچانے کیلئے کوششیں جاری ہیں۔ او جی ڈی سی ایل کی کارکردگی سب کے سامنے ہے۔ ایک سوال کے جواب میں شاہدخاقان عباسی نے کہا کہ جن کمپنیوں نے گیس کے منصوبوں میں کام نہیں کیا ان کیخلاف کارروائی کر رہے ہیں۔ اس موقع پر ایم ڈی او جی ڈی سی ایل نے کہا کہ ڈھوک سلطان میں کنویں سے 468 بیرل تیل ملا ہے، 380 ایل پی پلانٹ کو مارچ تک سسٹم میں لائیں گے۔ شاہد خاقان عباسی نے ایران پاکستان گیس پائپ لائن کے حوالے سے ایک سوال کے جواب میں کہا کہ ایران پر عالمی پابندیوں کی وجہ سے یہ منصوبہ آج تک نہیں چل سکا، جب ایران پر سے پابندیاں ہٹیں گی تو پھر اس منصوبے کیلئے فنانسر اور مینوفیکچرر آئیں گے۔ پاکستان کی طرف سے پیش رفت تب ہی ممکن ہے جب یہ پابندیاں ہٹ جائیں گی۔ انہوں نے کہا کہ پاکستان نے 780 کلو میٹر پائپ لائن اپنے علاقے میں بچھانی ہے، یہ آسان کام نہیں اور جب تک عالمی پابندیاں نہیں ہٹتیں کوئی بھی ادارہ خالی پائپ لائن بچھانے کیلئے فنڈنگ نہیں کرے گا۔ شاہد خاقان عباسی نے کہا کہ 460 ملین کیوبک فٹ گیس پاور سیکٹر، فرٹیلائزر اور انڈسٹری کو دی جا رہی ہے۔ ایک سوال کے جواب میں انہوں نے کہا کہ اگر کوئی بھی تحقیقاتی ادارہ سوئی ناردرن یا سوئی سدرن گیس کمپنی سے کسی قسم کی معلومات طلب کرے گا تو وہ تفصیلات مہیا کر دیں گے۔