اسلام آباد(نیوزڈیسک)حکومت نے نیشنل بینک آف پاکستان کو کہا ہے کہ وزیر اعظم یوتھ لون اسکیم کی پہلی دوقرعہ اندازیوں کےکامیاب امیدواروں میں قرضے کی رقم تقسیم ہونے تک تیسری قرعہ اندازی کو موخرکردیاجائے، حکومت نے نجی بینکوںکو بھی شامل کرنا شروع کردیا ہے،این بی پی کی انتظامیہ نے رابطہ کرنے پر بتایا کہ بینک پہلے ہی وزیر اعظم یوتھ لون اسکیم کی انتظامیہ سے مکمل تعاون کررہا ہے اور اب تک6067درخواست گذاروں میں4.99ارب روپے تقسیم کرچکا ہے، نیشنل بنک کے کوآرڈینیٹر برائے وزیر اعظم یوتھ بزنس لون اسکیم ارتضیٰ کاظمی نے بتایا کہ بنک نے تیسرے مرحلے کیلئے4900 کیسز کی منظوری دیدی ہے تاہم پہلے دو قرعہ اندازیوں کو مکمل کرنے تک تیسری قرعہ اندازی ملتوی کردی گئی ہے۔ پہلی قرعہ اندازی کے بارے میں انہوں نے بتایا کہ قرضے کیلئے10442درخواستوں کی منظوری دی گئی تاہم ان میں سے8800 نے افر لیٹر قبول کیے ان میں سے6067 نے مطلوبہ ضرورتیں پوری کیں اور ان کے قرضے منظور کرلیے گئے جبکہ2000 سے زیادہ کو مطلوبہ ضرورتیں پوری کرنی ہیں جس کے بعد ان میں قرضہ تقسیم کردیا جائیگا۔