دبئی ( مانیٹرنگ ڈیسک)یو اے ای کی شناخت، قومیت، کسٹمز اور پورٹس سکیورٹی کے لیے وفاقی اتھارٹی نے اپنے سمارٹ سروسز سسٹم کے ذریعے خاندانی گروپ کے لیے پانچ سال کی مدت کے لیے سیاحتی ویزا حاصل کرنا ممکن بنادیا۔ خلیجی اخبار ’الامارات الیوم‘ کے

مطابق اتھارٹی نے کہا ہے کہ ایک سے زیادہ بار داخلے کا ویزا تمام قومیتوں کو بغیر کسی سپانسر کے جاری کیا جاتا ہے، اس سے فائدہ اٹھانے والے کو ملک میں ایک مرتبہ داخلے کے بعد لگاتار 90 دن تک قیام کی اجازت ملتی ہے اور اسے اسی مدت کے لیے ایک بار بڑھایا بھی جا سکتا ہے، توسیع کے ساتھ قیام کی مدت ایک سال میں لگاتار 180 دنوں سے زیادہ نہیں ہونی چاہیے، جس کے لیے صارف کو داخلہ پرمٹ کے اجراء کی تاریخ سے 60 دنوں کے اندر اندر ملک میں داخل ہونے کی ضرورت ہے تاکہ اس کی منسوخی سے بچا جا سکے۔5 سالہ فیملی ٹورسٹ ویزا کے لیے ویب سائٹ اور سمارٹ ایپلیکیشن کے ذریعے درخواست دی جاسکتی ہے، ویزا کے لیے درخواست دینے اور اس کے لیے درکار ضروری دستاویزات کو پورا کرنے کے بعد ای میل کے ذریعے ویزا الیکٹرانک طور پر حاصل کیا جاسکتا ہے۔ویزا حاصل کرنے کے لیے بینک اکاؤنٹ اسٹیٹمنٹ ضروری ہے، اس کے ساتھ ہیلتھ انشورنس  متحدہ عرب امارات سے جاری کیا جانا چاہیے اور اس کی مدت 180 دن ہونی چاہئے۔