حیدرآباد(نیوز ڈیسک) تحریک انصاف نظریاتی جماعت نہیں بلکہ مفادی اور فسادی جماعت بن چکی ہے۔ ان خیالات کا اظہار تحریک انصاف کے سابق انفارمیشن سیکریٹری شیخ عدنان نثار نے دیگر عہدداران وکارکنان کے ہمراہ ایم کیو ایم حیدرآباد زونل آفس پر ایم کیو ایم میں اپنی شمولیت کا اعلان کے بعد زونل انچارج نوید شمسی و اراکین زونل کمیٹی سے گفتگو کرتے ہوئے کیا۔انہوں نے مزید کہا کہ عمران خان جو نوجوان قیادت کے دعوئے دار ہیں مگر ان کے عملی اقدامات اس کے منافی ہیں کے پی کے میں وزیر اعلیٰ پرویز خٹک اس بات کا منہ بولتا ثبوت ہے۔ انہوں نے کہا کہ عمران خان نے تحریک انصاف کو قبضہ مافیا کے سپرد کردیا ہے اب تحریک انصاف میں ایک غریب اور پڑھے لکھے نوجوانوں کی جگہ نہیں نظر آتی ہے۔انہوں نے کہا کہ الطاف حسین نے ملک کے اعلیٰ ایوانوں میں غریب اور پڑھے لکھے نوجوانوں کو بھیج کر ملک میں حقیقی تبدیلی کا آغاز کیا اور ان کی انقلابی جدوجہد سے متاثر ہوکر ہم حیدرآباد تحریک انصاف کے ذمہ داران و کارکنان ایم کیو ایم میں شمولیت اختیار کر رہے ہیں۔اس موقع پر ایم کیو ایم حیدرآباد کے زونل انچارج نوید شمسی نے ایم کیو ایم میں شمولیت اختیار کرنے والے شیخ عدنان نثار،عبدالحفیظ سومرو، سیدحادی شاہ، مبشر شیخ ،ملک وقاص ،فرحان شیخ ،نعمان خان، فیض خان ،کامران نثارسمیت دیگر ساتھیوں کو ایم کیو ایم کے حق پرستانہ قافلے میں شامل ہونے پر خوش آمدید کہتے ہوئے کہا کہ الطاف حسین کی جدوجہد حق پرست عوام کیلئے مشعل راہ ہے اور اس راہ پر چلنے والے یقینا قابل ستائش لوگ ہیں۔انہوں نے کہا کہ الطاف حسین اور ایم کیو ایم ایک فکر و فلسفے کانام ہے اور اس فکر و فلسفے کی روشنی سے ملک کا کونہ کونہ منور ہورہا ہے