لاہور(این این آئی) پاکستان تحریک انصاف نے پارٹی چیئرمین عمران خان کے مختلف عدالتی کاروائیوں میں بذریعہ ویڈیو لنک حصہ بننے کیلئے چیف جسٹس پاکستان کو خط ارسال کر دیا۔وائس چیئرمین شاہ محمود قریشی اور سیکرٹری جنرل اسد عمر کی جانب سے چیف جسٹس آف پاکستان کو تحریر کئے گئے
مشترکہ خط میں کہا گیا ہے کہ عمران خان پاکستان کے سابق وزیر اعظم اور ملک کی سب سے بڑی جماعت کے سربراہ ہے،عمران خان کو اقتدار سے سازش کے تحت ہٹانے کے بعد ان پر اور تحریک انصاف کی قیادت پر متعدد جھوٹے مقدمے درج کیے گئے،عمران خان پر وزیر آباد میں قاتلانہ حملہ کیا گیا،جس کے نتیجے میں وہ بری طرح زخمی ہوئے،اطلاعات ہیں کہ عدالتوں میں دوبارہ پیشیوں کے دوران عمران خان پر قاتلانہ حملہ کیا جاسکتا ہے،ماضی میں پاکستان متعدد سیاسی لیڈران پر حملوں اور ان کی شہادتوں کے مناظر دیکھ چکا ہے،خدہے کہ اگر مناسب سکیورٹی انتظامات نہ ہوئے تو عمران خان پر دوبارہ حملہ ہوسکتا ہے،عمران خان کی زندگی کو شدید خطرات لاحق ہیں، ان کو مناسب سکیورٹی فراہم نہیں کی جارہی،اسلام آباد ہائیکورٹ میں بھی حالیہ پیشی پر عمران خان کے لئے مناسب سکیورٹی کے انتظامات نہیں تھے،عمران خان کے خلاف مقدمات بنانے کا مقصد ان پر دوبارہ حملے کا ماحول بنانا ہے۔استدعا ہے کہ موجودہ صورتحال کے پیش نظر عمران خان کو مختلف عدالتوں میں بذریعہ ویڈیو لنک پیش ہونے کی اجازت دی جائے۔
