لاہور (این این آئی)احتساب عدالت میں محمد شہباز شریف کے خلاف آشیانہ سیکنڈل میں نیب کے وعدہ معاف گواہ بیان سے منحرف ہوگئے اور کہا ہے کہ مجھ پر دبائو اور جبر سے شہباز شریف کے خلاف وعدہ معاف گواہ بننے پر مجبور کیا گیا،ڈی جی نیب شہزاد سلیم، ڈائریکٹر نیب محمد رفیع اور کیس آفیسر آفتاب احمد نے دباو ڈال کر جھوٹی شہادت لی۔
لاہور کی احتساب عدالت میں آشیانہ اسیکنڈل کی سماعت میں شہباز شریف کے وکیل امجد پرویز نے گواہ اسرار سعید پر جرح کی۔ایل ڈی اے کے چیف انجینئر اسرار سعید نے شہباز شریف کے وکیل امجد پرویز کی جرح میں اعتراف کیا کہ عدالت میں پہلا بیان بھی دبائو اور جبر کی وجہ سے دیا۔ اسرار سعید نے کہاکہ ڈی جی نیب شہزاد سلیم نے شہباز شریف پر ہراساں کرنے کا الزام لگانے کو کہا۔ اسرار سعید نے کہاکہ ڈی جی نیب اس بیان کو شہباز شریف کی ضمانت کینسل کرانے کے لیے استعمال کرنا چاہتا تھا۔ انہوںنے کہاکہ مجھ پر بند انکوائریاں کھول کر نئے کیس بنانے کی دھمکیاں دی جاتیں۔ انہوںنے کہاکہ ے نیب ڈائریکٹر محمد رفیع نے وارنٹ گرفتاری دکھا کر پہلے سے تیار بیان پر دستخط کی آفر کی۔ اسرار سعید نے کہاکہ انکار پر نیب نے گرفتار کر لیا اور دس دن کا جسمانی ریمانڈ لے لیا۔ اسرار احمد نے امجد پرویز ایڈووکیٹ کے سوال پر جج کے روبرو جواب دیا کہ واش روم میں سی سی ٹی وی کیمرہ لگائے گئے تھے۔ انہوںنے کہاکہ دوسرے ریمانڈ پر چئیرمین نیب جاوید اقبال اور ڈی جی شہزاد سلیم میرے سیل میں آئے۔ اسرار سعید نے کہاکہ دونوں نے کہا کہ ان پر بہت پریشر ہے دستخط کر دوں ورنہ میری مشکلات بڑھ جائیں گی۔ انہوںنے کہاکہ مجھے نوئے دن کے ریمانڈ اور آمدن سے زائد اثاثوں کا کیس کھولنے سے ڈرایا گیا۔ اسرار سعید نے کہاکہ مجھ پر دبائو ڈال کر اس بیان پر دستخط کروائے گئے
جو سچ نہیں تھا۔ اسرار سعید نے کہاکہ وعدہ معاف گواہ بننے کے بعد نیب نے میری لاہورہائیکورٹ سے ضمانت منظوری کی مخالفت نہ کی۔ انہوںنے کہاکہ شہباز شریف پر ہراساں کرنے کا الزام نہ لگانے پر نیب نے مجھے ڈرین پراجیکٹ کے الزامات پر دوبارہ گرفتار کر لیا۔ انہوںنے کہاکہ
چار ماہ بعد ضمانت ہو گئی اور اس کیس کا کوئی ریفرنس فائل نہیں ہوا۔ انہوںنے کہاکہ آشیانہ ہاؤسنگ پراجیکٹ ایک شفاف منصوبہ تھا جسمیں کسی قانون کی خلاف ورزی نہیں کی گئی۔ اسرار سعید نے کہاکہ عوام سے کوئی فراڈ یا دھوکہ دہی نہیں کی گئی۔ انہوںنے کہاکہ تحریک انصاف کے دور میں احد چیمہ کے خلاف انکوائری کے دوران کسی خلاف وزری کا کوئی بیان نہیں دیا۔
