استنبول (اے پی پی)تُرکیہ اور شام میں آنے والے تباہ کن زلزلے سے بچ جانے والوں کی امید ختم ہوتے ہی امدادی کارکنوں نے ملبے تلے 182 گھنٹے گزارنے والے 13 سالہ لڑکے کو زندہ باہر نکال لیا۔

ذرائع کے مطابق زلزلے کے ایک ہفتے سے زیادہ عرصے کے بعد پیر کے روز جنوبی ترکہ کے صوبہ ہاتے میں ایک منہدم عمارت کے ملبے کے نیچے سے نو عمر لڑکے کو ریسکیو کارکنوں نے بچایا لڑکا معجزانہ طور پر زندہ پایا گیا ۔اس واقعے کی ایک ویڈیو بھی میڈیا پر جاری کی گئی ہے۔رائٹرز کے مطابق لڑکے نے بچاؤ کرنے والے کا ہاتھ اس وقت پکڑ لیا جب اس کو سٹریچر پر رکھا گیا۔ اسے ایمبولینس کی مدد سے ہسپتال منتقل کر دیا گیا ہے۔ ترکیہ اور شام میں آنے والے تباہ کن زلزلے کے بعد اب بھی سینکڑوں افراد ابھی بھی ہزاروں ٹن وزنی عمارتوں کے ملبے تلے دبے ہوئے ہیں۔ترکیہ اور ہمسایہ ملک شام میں گزشتہ پیر کو آنے والے 7.8 شدت کے زلزلے سے مرنے والوں کی کل تعداد 37,000 سے زیادہ ہو چکی ہے اور اس میں مزید اضافہ ہونے کا احتمال ہے۔