مانچسٹر (نیوز ڈیسک) انگلینڈ نے تیسرے ون ڈے میچ میں آسٹریلیا کو 93 رنز سے شکست دے کر پانچ میچوں کی سیریزمیں پہلی کامیابی حاصل کر لی ہے۔ جیمز ٹیلر نے بہترین بیٹنگ کرتے ہوئے 101 رنز کی اننگز کھیلی اور جیت میں اہم کردار ادا کیا۔تفصیلات کے مطابق اولڈ ٹریفوڈ میں کھیلے گئے میچ میں انگلینڈ نے ٹاس جیت کر پہلے بیٹنگ کا فیصلہ کیا اور مقررہ 50 اوور میں 8 وکٹوں کے نقصان پر 300 رنز بنائے۔ جیمز ٹیلر 101 رنز بنا کر نمایاں بلے باز رہے جبکہ دیگر بلے بازوں میں رائے نے 63، ہیلز نے 9، مورگن نے 62، سٹاکس نے 14، بیرسٹو نے 17، معین علی، پلنکٹ اور عادل راشد نے ایک ایک جبکہ واکس نے 14 بنائے۔ آسٹریلیا کی جانب سے کمنز اور میکس ویل نے 2,2 کھلاڑیوں کو آﺅٹ کیا جبکہ مچل سٹارک اور ایشٹن اگر نے ایک ایک وکٹ حاصل کی۔
ہدف کے تعاقب میں آسٹریلوی بلے باز ریت کی دیوار ثابت ہوئے اور پوری ٹیم 207 رنز بنا کر آﺅٹ ہو گئی۔ ایرون فنچ کے علاوہ کوئی بھی بلے باز برطانوی باﺅلرز کا مقابلہ نہ کر ، انہوں نے 53 رنز بنائے۔ دیگر بلے بازوں میں برنز نے 9، سمتھ نے 25، بیلی نے 25، میکس ویل نے 17، مارش نے 13، ویڈ نے 42، اگار نے 5، سٹارک نے 1، کمنز نے 5 اور پیٹنسن نے 2 رنز بنائے۔ انگلینڈ کی جانب سے پلنکٹ اور معین علی نے 3,3 وکٹیں حاصل کیں جبکہ فن اور عادل راشد نے ایک ایک کھلاڑی کو پویلین کی راہ دکھائی۔
میچ میں شکست کے باوجود آسٹریلیا کو پانچ میچوں کی سیریز میں 2-1 کی برتری حاصل ہے جبکہ سیریز کا چوتھا میچ 11ستمبر کو لیڈز کے میدان میں کھیلا جائے گا۔