لاہور(نیوزڈیسک)پنجاب اسمبلی میں ورکنگ باؤنڈری پربھارتی جارحیت اور صوبے میں مضرصحت گوشت کی فروخت سمیت 5قراردادیں منظور کی گئیں ،قصور ویڈیو اسکینڈل اور نہری پانی کی کمی کا شور بھی اٹھا ،اسپیکر نے موبائل سے کھیلنے پر حکومتی رکن کو ایوان سے نکال دیا۔ورکنگ باؤنڈری پر بھارتی جارحیت کے خلاف قرارداد ق لیگ کی رکن خدیجہ عمر نے پیش کی ۔ قرارداد میں حکومت سے مطالبہ کیا گیا کہ بھارت بین الاقوامی قوانین کی خلاف ورزی کر رہا ہے،اس کے خلاف عالمی سطح پر احتجاج کیا جائے،قرارداد میں پاک فوج کو بھرپور خراج تحسین پیش کیا گیا ۔پی ٹی آئی کے رکن میاں اسلم نے وطن پر جانیں قربان کرنے والوں کو سرکاری شہید قرار دینے کی قرارداد پیش کی ۔ حلال گوشت کی سرکاری نرخوں پر فروخت یقینی بنانے ،حالیہ سیلاب کے نقصانات کے ازالے اور کسی اہم شاہراہ کو مہاراجہ رنجیت سنگھ کے نام منسوب کرنے کی قراردادیں بھی منظور کر لی گئیں۔آج پنجاب اسمبلی میں پہلا شور حکومتی رکن ارشد ملک نے اٹھایا ،انہوں نے اپنے علاقے میں نہری پانی کی کمی کا رونا رویا۔قصور ویڈیو اسکینڈل پر وزیر قانون رانا ثناءاللہ نے بتایا کہ تفتیش ہو رہی ہے ۔ایک ہفتے میں رپورٹ آ جائیگی،اجلاس اپنی انتہا پر تھاتو حکومتی رکن عبدالمنان موبائل فون سے کھیلنے میں مصروف ،اسپیکر نے ایوان سے نکال دیا،اجلاس غیرمعینہ مدت کیلیے ملتوی کر دیا گیا