لاہور (نیوزڈیسک) لاہور ہائیکورٹ مبینہ طور پر 980ملین روپے کے فراڈ میں ملوث پیپلز پارٹی کے رہنماءسینٹر سیف اللہ بنگش کے بیٹے کو ضمانت پر رہا کرنے کا حکم دیدیا۔ گزشتہ روز لاہور ہائیکورٹ میں جسٹس محمودمقبول باجوہ اور جسٹس فرخ گلزار اعوان پر مشتمل ڈویژن بینچ نے کیس کی سماعت کی ۔ درخواست گزار شوکت اللہ بنگش کی درخواست ضمانت پر ملزم کے وکیل نے موقف اختیار کیا کہ نیب نے بے بنیاد ریفرنس میں ملوث کر کے 9 اگست سے گرفتار کر رکھا ہے، نیب نے 980 ملین روپے کے فراڈ کے مقدمہ میں بغیر ٹھوس شواہد کے ملوث کر کے گرفتار کیا ہے جبکہ ملزم کے خلاف درج نیب ریفرنس میں شوکت اللہ بنگش قصر ذوق کے متاثرین میں شامل ہے ، ملزم نے قصرذوق لبرٹی کی اراضی ایشین گیس کمپنی کو پانچ کروڑ روپے میں فروخت کر دی تھی اور ملزم لوگوں سے فراڈ میں ملوث نہیں لہٰذا معزز عدالت سے استدعا ہے کہ ضمانت منظور کرتے ہوئے رہا کرنے کا حکم دیا جائے۔دوران سماعت نیب کے پرایسکیوٹر نے درخواست ضمانت کی مخالفت کرتے ہوئے بتایا کہ ملزم کے خلاف ٹھوس ثبوت اور شواہد موجود ہیں جبکہ مزید تحقیقات کی جا رہی ہیں، ملزم قصر ذوق لبرٹی میں عوام الناس سے فراڈ کرنے میں ملوث ہے لہٰذا درخواست ضمانت خارج کی جائے۔عدالت نے فریقین کے دلائل سننے اور ریکارڈ دیکھنے کے بعد ملزم کو پانچ لاکھ کے ضمانتی مچلکوں پر رہا کرنے کا حکم دیدیا۔