لاہور ( این این آئی)پاکستان کرکٹ بورڈ کے عبوری چیف سلیکٹر شاہد آفریدی نے نیوزی لینڈ کے خلاف پہلے ون ڈے میچ کے بعد ٹیم کے لئے تعریفی ٹوئٹ کردی۔عبوری سلیکشن کمیٹی کے سربراہ شاہد خان آفریدی نے اپنی ٹوئٹ میں کہا کہ شاندار کوشش اور کارکردگی پر بابر اعظم اور پوری ٹیم کو مبارکباد پیش کرتا ہوں، ہم نے کھیل کے ہر شعبے میں نیوزی لینڈ کو آئوٹ کلاس کردیا۔انہوں نے کہا کہ بابراعظم ، نسیم شاہ ، اسامہ میر ، حارث سہیل اور محمد رضوان کے لئے بڑا دن ہے، فخرزمان نے بھی اچھا آغاز فراہم کیا، امید ہے ہم دوسرے میچ میں بھی کارکردگی کا تسلسل برقرار رکھیں گے۔یاد رہے کہ پیر کے روز کراچی کے نیشنل اسٹیڈیم میں کھیلے گئے پہلے ون ڈے میں گرین شرٹس نے کیویز کو 6 وکٹوں سے شکست دی تھی۔