لاہور(این این آئی)پاکستان کرکٹ بورڈ نے2023 کے ورلڈکپ تک شاہد آفریدی کوعبوری چیف سلیکٹر سے  بطور چیف سلیکٹر بنانے پر غور شروع کر دیا تاہم شاہد آفریدی اس کے لیے رضامند نہیں ہیں۔ذرائع کے مطابق پی سی بی چیف سلیکٹر شاہد آفریدی کی مزید ذمہ داریاں بڑھانے کا خواہشمند ہے

اور بورڈ ورلڈکپ 2023 تک انہیں چیف سلیکٹر کی ذمہ داریاں دینا چاہتا ہے، پی سی بی پی ایس ایل کے بعد اور سیریز سے قبل طویل المدتی تقرریاں کر لے گا۔نجی ٹی وی کے مطابق نیوزی لینڈ کے خلاف ون ڈے سیریز کے بعد شاہد آفریدی سلیکشن کمیٹی کو خیر باد کہہ دیں گے کیوں کہ شاہد اپنی تمام تر توجہ اپنی چیریٹی فاونڈیشن پر مرکوز کرنا چاہتے ہیں۔ذرائع کے مطابق شاہد آفریدی نے عبوری چیئرمین نجم سیٹھی کو اپنے فیصلے سے آگاہ کرتے ہوئے کہا ہے کہ طویل المیعاد بنیادوں پر کام کرنا ممکن نہیں، کسی موقع پر پی سی بی کے ساتھ کا م کیا تو گراس روٹ لیول پر کروں گا۔نجی ٹی وی کے مطابق سابق کپتان اور عبوری چیف سلیکٹر شاہد آفریدی نے کہا کہ میں پہلے بھی کہہ چکا ہوں کہ میرے لیے مزید کام کرنا ممکن نہیں ہے، کوشش کررہا ہوں کہ جتنی دیر کام کروں ،کسی کے ساتھ نا انصافی نہ ہو اور اہل کھلاڑی پاکستانی ٹیم کا حصہ بنیں، ہر کھلاڑی کے ساتھ خود رابطہ کررہا ہوں تاکہ رابطے کا فقدان ختم ہوسکے۔