’’وزیراعلی چودھری پرویز الہٰی کی کرسی خطرے میں پڑ گئی ‘‘
لاہور ( این این آئی) پاکستان پیپلز پارٹی کے شریک چیئرمین و سابق صدر آصف علی زرداری کی چند روز میں لاہور آمد کا امکان ہے۔ ذرائع کا کہنا ہے کہ آصف علی زرداری پنجاب کی وزارتِ اعلی کے حصول کے لیے وفاقی وزراء کی معاونت کریں گے۔ذرائع نے بتایا کہ پاکستان ڈیموکریٹک موومنٹ (پی ڈی ایم)رہنمائوں کا پاکستان مسلم لیگ (ق) اور پاکستان تحریک انصاف کے ارکان توڑنے کے لیے بیک ڈور رابطوں کا سلسلہ تیز ہوگیا ہے۔ اعتماد کے ووٹ کی حکمت عملی سے متعلق ذرائع نے بتایا کہ بیک ڈور رابطوں میں اعتماد کے ووٹ کے موقع پر ارکان کو غیر حاضر رہنے کے لئے مختلف ترغیبات دی جائیں گی۔ ذرائع کا کہنا تھا کہ ارکان اسمبلی کو غیر حاضر رہنے کی صورت میں آئندہ پارٹی ٹکٹ دینے کی بھی پیشکش کی جائے گی۔ذرائع نے یہ بھی بتایا کہ پی ڈی ایم کی جانب سے خواتین اور اقلیتی ارکان اسمبلی پر خصوصی توجہ دی جائے گی۔
