اسلام آباد(نیوز ڈیسک)انیس سو پینسٹھ کی جنگ سے لے کر کارگل کے محاذ تک وطن کی خاطر جان قربان کرنے والوں نے تاریخ میں دلیری اور شجاعت کی لازوال داستانیں رقم کیں ۔ ایسی ہی ایک مثال حولدار لالک جان شہید کی ہے جنہوں نے کارگل جنگ میں دشمن کو ایسی کاری ضرب لگائی جو وہ صدیوں نہیں بھلا سکے گا۔ معرکہ کارگل میں رضا کارانہ طور پر شرکت کرنے والے 12 این ایل آئی رجمنٹ کے حولدار لالک جان شہید کا تعلق گلگت بلتستان کے ضلع غذر سے تھا۔کارگل جنگ کے دوران جب دشمن نے پاک فوج پر زمینی حملہ کیا تو قوم کے اس نڈر فرزند نے زخموں سے چور ہونے کے باوجود کئی گھنٹے تک دشمن کا جواں مردی سے مقابلہ کیا اور اسے ناکوں چنے چبوا دیئے۔لالک جان شہید نشان حیدر نے 7 جولائی 1999 کو دشمن کے ناپاک عزائم خاک میں ملاتے ہوئے ملک کی خاطر اپنی زندگی نچھاور کر دی اور شہادت کے عظیم مرتبے پر فائز ہوئے۔ لالک جان شہید کے بارے میں ان کے عزیزوں کا کہنا ہے لالک جان شہید نے جو قابل فخر کارنامہ سر انجام دیا اس پر انہیں پاک فوج کے سب سے بڑے اعزاز نشان حیدر سے نوازا گیا جو ان کے لئے باعث فخرہے۔