حافظ آباد(نیوزڈیسک)ضلعی انتظامیہ نے میونسپل اسٹیڈیم میں جلسہ کےلئے پاکستان تحریک انصاف سے سیکیورٹی کے نام پر10لاکھ روپے اور 50ہزار روپے کرا یہ مانگ لیا۔انتظامیہ کو نہ تو سیکیورٹی کی مد میں کوئی پیسہ دیں گے اور نہ ہی کرایہ۔5ستمبر کو پی ٹی آئی حافظ آباد میں جلسہ ضرور کرے گی جس سے عمران خان اور دیگر مرکزی قائدین خطاب کریں گے۔ان خیالات کا اظہار پی ٹی آئی کے صوبائی آرگنائزر عمر چیمہ نے سابق ایم این اے چوہدری مہدی حسن بھٹی ،ضلعی آرگنائزر پی ٹی آئی چوہدری شوکت علی بھٹی، شعیب حیات تارڑ،امان اللہ سندھو ایڈ ووکیٹ خالد لون اور دیگر صوبائی عہدیداران کے ہمراہ مشترکہ پریس کانفرنس سے خطاب کرتے ہوئے کیا۔عمر چیمہ نے کہا کہ ضلعی انتظامیہ مختلف طریقوں سے ہمارے کارکنوں کو حراساں کر رہی ہے اور پی ٹی آئی کی کسان کنونشن کے سلسلہ میں لگائی جانے والی فلیکسیں بھی اُتاری جا رہی ہیں۔اُنہوں نے کہا کہ شریف برادران نے ہمیشہ اپنے دور حکومت میں کسانوں اور مزدوروں کا استحصال کیا ہے ۔ملکی تاریخ میں پہلی مرتبہ پی ٹی آئی کسانوں اور مزدوروں کے حقوق کےلئے آواز بلند کرنے کےلئے میدان عمل میں نکلی ہے اور اس تحریک کا آغاز5ستمبر کو حافظ آباد سے کیا جا رہا ہے۔اُنہوں نے کہا کہ 5ستمبر کو ہونے والے کسان مزدور کنونشن میں ان کے حقوق اور مسائل کو اُجاگر کیا جائے گا تاکہ ان طبقات کے بنیادی مسائل کو بھی حل کیا جا سکے۔اگر پی ٹی آئی کے جلسہ کو روکنے سے حالات خراب ہوئے تو اُس کی ذمہ دار پنجاب حکومت اور ضلعی انتظامیہ ہو گی۔اُنہوں نے کہا کہ شریف برادران چھٹی مرتبہ حکومت میں آنے کے باوجود عوام با لخصوص کسانوں،کاشتکاروں،مزدوروں اور چھوٹے تاجروں کے مسائل حل کرنے میں بری طرح ناکام ہو چکے ہیں۔حکومت کی ناقص اور مفاد پرستانہ پالیسیوں سے شعبہ زراعت تباہی کے دھانے اور کسان زبو ںحالی کی دل دل تک پہنچ چکے ہیں۔عمر چیمہ نے کہا کہ پی ٹی آئی کی مقبولیت سے پنجاب حکومت بو کھلا کر اوچھے ہتھکنڈوں پر اتر آئی ہے اور ہمارے کارکنوں کو حراساں کیا جا رہا ہے جسے کسی صورت برداشت نہیں کیا جائے گا۔اس موقع پر سابق ایم این اے مہدی حسن بھٹی نے خطاب کرتے ہوئے کہا کہ مقامی انتظامیہ کی آشیر باد پر مسلم لیگ ن کے بعض کارکن ہماری فلیکسزاُتار رہے ہیں جن کا مقصد امن و امان کو بگاڑنا ہے اگر کوئی ایسی صورتحال پیدا ہوئی تو اس کی ذمہ دار مقامی انتظامیہ اور ن لیگ کے کرتا دھرتا ہوں گے۔اُنہوں نے کہا کہ قانون سب کےلئے برابر ہونا چاہیے اگر میونسپل ااسٹیڈیم میں نواز شریف کے جلسہ کےلئے مسلم لیگ ن سے کوئی سیکیورٹی یا کوئی کرایہ لیا گیا ہے تو انتظامیہ اُس کا ثبوت دے پھر پی ٹی آئی بھی سیکیورٹی یا کرایہ ادا کرنے کےلئے تیار ہے۔اُنہوں نے مزید کہا کہ وزیر مملکت سائرہ افضل تارڑ کے ڈیرہ سے منشیات اور جرائم پیشہ افراد کو گرفتار کیا گیا لیکن پولیس نے اُن کیخلاف کوئی بھی کاروائی نہیں کی،ہمارا مطالبہ ہے کہ جرائم پیشہ افراد کی گرفتاری اور منشیات بر آمد ہونے پر وزیر مملکت سائرہ افضل تارڑ کیخلاف قانونی کاروائی کی جائے اور اُنہیں وزارت سے فارغ کیا جائے۔