اسلام آباد (آن لائن )حکومت کیخلاف پاکستان تحریک انصاف کا فیصلہ کن لانگ مارچ سے قبل اسلام آباد اور گرد و نواح کے اضلاع کی تنظیموں کو بھرپور طریقے سے تیار کرنے کا فیصلہ کیا گیا ہے ، عمران خان پشاور ریجن اور فیصل آباد ڈویڑنز میں بڑے ورکرز کنونشن سے خطاب کریں گے ۔ذرائع کے مطابق تحریک انصاف کے مرکزی قائدین
کے اہم ترین مشاورتی اجلاس کا انعقاد کیا گیا ۔چیئرمین تحریک انصاف عمران خان نے اجلاس کی صدارت کی ۔ اجلاس میں ملکی مجموعی سیاسی صورتحال، مجرموں کو ملنے والے این آر او اور تازہ ترین آڈیو لیکس سمیت اہم امور پر تفصیلی تبادلہ خیال کیا گیا اور اسلام آباد لانگ مارچ کی تیاریوں کے حوالے سے جامع حکمت عملی پر نہایت مفصل مشاورت کی گئی ۔ اجلاس میں امپورٹڈ حکومت کی جانب سے شرانگیزی اور تشدد کے امکانات پر بھی نہایت تفصیل سے غور کیا گیا اور لانگ مارچ کی تاریخ کے اعلان کے بعد بیک وقت کئی ایک حکمتِ عملی نکات کو حتمی شکل دینے کا فیصلہ کیا گیا۔ذرائع کے مطابق حتمی تاریخ کے اعلان سے قبل چیئرمین تحریک انصاف نے اسلام آباد اور گرد و نواح کے اضلاع کی تنظیموں کو بھرپور طریقے سے تیار کرنے کا فیصلہ کیا ہے ۔ عمران خان پشاور ریجن اور فیصل آباد ڈویڑنز میں بڑے ورکرز کنونشن سے خطاب کریں گے ۔ عمران خان کی جانب سے ذمہ داران کو اہداف سونپ دیے گئے ۔اجلاس سے خطاب کرتے ہوئے عمران خان کا کہناتھا کہ اشرافیہ کیلئے اور عوام کیلئے دوسرے قانون کی روایت ملک کو تباہی کی دلدل میں دھکیل رہی ہے۔قانون کی حکمرانی آگے بڑھنے کا واحد رستہ ہے۔این آر اوز قانون کی حکمرانی کیلئے زہرِ قاتل، قوم پر مسلط بحرانوں کا حقیقی سبب ہیں، عمران خان نے کہا کرپٹ اور مجرم گروہ کیخلاف فیصلہ کن حقیقی مارچ کا مرحلہ آن پہنچا ہے۔
بھرپور عوامی تائید و شرکت پاکستان کو غلامی و محکومی کے شکنجے سے آزاد کروانے کیلئے لازم ہے، عمران خان نے کہا بدترین مہنگائی، معاشی بربادی اور چوروں نے شکنجے سے نجات کیلئے عوام میدانِ عمل میں نکلنے کی تیاری کریں۔ظالموں کو مزید مہلت نہیں دیں گے، جلد تاریخی کانگ مارچ کی تاریخ کا باضابطہ اعلان کروں گا۔
