کراچی (نیوزڈیسک)کراچی میں چائنہ کٹنگ کا پیسہ منی لانڈرنگ کے ذریعے سیاسی جماعت کو دیا گیا جو دہشت گردی میں بھی استعمال ہوا ، اینٹی کرپشن سندھ نے لینڈ ڈیپارٹمنٹ سے زمینوں کی تفصیلات طلب کرلیں۔کراچی میں چائنہ کٹنگ میں ملوث ملزمان کے گرد گھیرا مزید تنگ ہو گیا ہے ۔ اینٹی کرپشن ڈیپارٹمنٹ نے ڈائریکٹر لینڈ کو چائنہ کٹنگ کے حوالے سے خط لکھا ہے۔خط میں واضح طور پر بتایا گیا ہے کہ گرافکس چائنہ کٹنگ کے ذریعے کمایا گیا پیسہ منی لانڈرنگ کے ذریعے سیاسی جماعت کو گیا ہے ، چائنہ کٹنگ کی رقم دہشت گردی میں بھی استعمال ہوئی ہے۔اینٹی کرپشن کے خط میں لکھا گیا کہ ڈائریکٹر لینڈ کے ایم سی اور کے ڈی اے کی زمین کی تمام تفصیلات فراہم کی جائیں۔کہاں کہاں سرکاری پروجیکٹس کی منصوبہ بندی کی گئی ، لینڈ مافیا نے کہاں کہاں قبضہ کیا ہوا ہے ، اینٹی کرپشن نے ڈائریکٹر لینڈ سے تفصیلات طلب کرلیں۔اینٹی کرپشن نے خط میں واضح کیا ہے کہ جن زمینوں کی فائلیں غائب ہیں ، ان کی معلومات بھی دی جائیں تاکہ تفتیش کا دائرہ مزید وسیع کیا جا سکے۔