کراچی(این این آئی)قومی کرکٹ ٹیم کے سابق کپتان شاہد آفریدی نے کہا ہے کہ سری لنکا کے دورے کے دوران سرفراز احمد کو اسکواڈ میں موقع ملنا چاہیے تھا۔نجی ٹی وی چینل سے گفتگو کرتے ہوئے قومی کرکٹ ٹیم کے سابق کپتان شاہد آفریدی نے کہا کہ پلیئنگ الیون میں اگر کسی کو تبدیل کرنے کی ضرورت ہو تو کھلاڑیوں کو تیار ہونا چاہیے، اس طرح پلئیر صلاحتیں دکھانے پر مجبور ہوتا ہے

۔انہوں نے کہا کہ اگر محمد رضوان پرفارم نہیں کر رہے ہیں تو شاید سرفراز احمد کو سری لنکا کے دورے میں موقع دیا جاسکتا تھا، بنچ جتنا مضبوط ہوگا، کھلاڑی اپنی کارکردگی کے بارے میں اتنا ہی محتاط ہوگا۔آل راؤنڈر نے کہا کہ گزشتہ تین ٹیسٹ میچوں میں محمد رضوان نے 0، 19، 40، 24 اور 37 رنز بنائے ہیں، ان کی فارم خراب چل رہی ہے انہیں کچھ وقت آرام کروانا چاہیے تاکہ وہ بہترین کم بیک کرسکیں۔سابق کپتان نے قومی ٹیم میں تعصب پسندی کے حوالے سے بات کرتے ہوئے کہا کہ ٹیم میں یہ ایک طویل عرصے سے جاری ہے، ‘یہ لڑکا کراچی کا ہے، یا یہ لڑکا لاہور کا ہے، مجھے نہیں لگتا کہ یہ چیزیں ہونی چاہئیں، انسان کے بچے بن جائیں گے تو بہتر ہے۔