لاہور( این این آئی)وزیراعظم شہبازشریف نے سیالکوٹ میں آگ لگنے سے گندم کی تیار فصل کی تباہی سے متاثرہ کسانوں کی مالی امداد کا حکم دیدیا۔ وزیراعظم شہباز شریف نے پنجاب حکومت کو حکم دیا کہ 90 ہزار کلوگرام گندم جل کر راکھ ہونے پر
کسانوں کی فوری مالی مدد کی جائے او رانہیںامدادی چیک دئیے جائیں۔وزیر اعظم شہباز شریف نے کہا کہ رمضان المبار ک ہے، مشکل وقت میں کسانوں کی بھرپور مدد کی جائے۔بیلہ پل باجواں، بجوت سیکٹر میں 23 اپریل 2022 کو گندم کی تیار فصل کو آگ لگ گئی تھی جس سے 77 ایکڑ رقبہ متاثرہواتھا، 76 ایکڑ میں گندم کی فصل کٹائی کے لئے تیار حالت میں کھڑی تھی ۔سرکاری رپورٹ کے مطابق 15 کاشتکاروں کی تیارگندم جل گئی تھی ۔تحقیقات میں بتایا گیا تھا کہ کٹائی مشین میں فنی خرابی سے آگ لگی مشین کے قریب ہی ذخیرہ کردہ 80 لیٹر ڈیزل کے آگ پکڑنے سے حادثے کا دائرہ پھیل گیا تھا،فاصلہ زیادہ ہونے کی بناء پر فائر بریگیڈ کو پہنچنے میں وقت لگا۔ سرکاری رپورٹ کے مطابق فائر بریگیڈ نے 32 کلومیٹر کا فاصلہ 25 منٹ میں طے کیا،فائربریگیڈ کی کوششوں سے آگ کو 135 ایکڑ میں پھیلنے سے روکاگیا ۔