راولپنڈی (این این آئی)صوبہ بلوچستان میں آواران کے قریب کاہان میں سیکیورٹی فورسز اور دہشتگردوں میں جھڑپ میں میجر شاہد بشیر بہادری سے لڑتے ہوئے شہید اور،ایک سپاہی زخمی ہوگیا ۔ آئی ایس پی آر کے مطابق 21 اور 22 اپریل کی

درمیانی رات دہشت گردوں نے بلوچستان میں آواران کے قریب کاہان کے علاقے میں سیکورٹی فورسز کی ایک چوکی پر حملہ کیا، سکیورٹی فورسز کے جوانوں نے یہ حملہ کامیابی سے پسپا کردیا، فرار ہونے والے دہشت گردوں کا تعاقب قریبی پہاڑوں میں کیا گیا، فرار ہونے والے دہشت گردوں کو روکنے کے لئے قائم کردہ رکاوٹوں کی پوزیشنوں میں سے ایک پر دہشت گردوں اور سیکورٹی فورسز کے درمیان شدید فائرنگ کا تبادلہ ہوا، جھڑپ کے دوران وطن کے ایک اور بہادر سپوت میجر شاہد بشیر نے جام شہادت نوش کیا، جبکہ ایک سپاہی زخمی ہو گیا، دہشت گردوں کو اس دوران شدید نقصان پہنچا، سیکیورٹی فورسز نے اس عزم کا اعادہ کیا ہے کہ وہ قوم کے ساتھ مل کر بلوچستان کے امن، استحکام اور ترقی کو سبوتاڑ کرنے کی کوششوں کو ناکام بنانے کے لئے پرعزم ہیں۔