اسلام آباد (این این آئی)پاکستان اور نائیجیریا نے باہمی فائدے کے لیے مختلف شعبوں میں تعاون بڑھانے کی ضرورت پر زور دیتے ہوئے دفاع اور انسداد دہشت گردی کے شعبوں میں تعاون کو مزید گہرا کرنے کی خواہش کا اعادہ کیا ہے۔
یہ بات ایوان صدر میں نائیجیرین مسلح افواج کے چیف آف ڈیفنس سٹاف جنرل لکی ایلونوئے اونینیوچیا ایرابور اور صدر مملکت ڈاکٹر عارف علوی کے درمیان ملاقات کے دوران ہوئی۔ نائجیریا کے وفد کا خیرمقدم کرتے ہوئے صدر نے کہا کہ پاکستان نائیجیریا کے ساتھ اپنے تعلقات کو بہت اہمیت دیتا ہے اور نائیجیریا کے ساتھ بامعنی دفاعی تعلقات کا خواہاں ہے۔ انہوں نے بین الاقوامی دفاعی نمائش اور سیمینار میں نائجیریا کی مسلح افواج کے نمائندوں کی شرکت کو سراہا۔ صدر نے بھارتی غیر قانونی مقبوضہ جموں و کشمیر میں انسانی حقوق کی خلاف ورزیوں پر بھی روشنی ڈالی اور کہا کہ جنگجو پڑوسی ملک مسلمانوں کی نسل کشی میں ملوث ہے۔ انہوں نے بتایا کہ پاکستان کو دہشت گردی سے نمٹنے کا زبردست تجربہ ہے اور اس نے ملک میں دہشت گرد عناصر کو کامیابی سے شکست دی۔ انہوں نے دونوں ممالک کے درمیان تجارتی اور اقتصادی تعاون بڑھانے کی ضرورت پر زور دیا۔ جنرل لکی ایلونئے اونینچیا ایرابور نے دونوں ممالک کے درمیان دوستی کے بندھن کو مضبوط بنانے کی ضرورت پر زور دیا۔ انہوں نے صدر کو نائیجیریا کے صدر کی جانب سے نیک خواہشات کا اظہار کیا۔ انہوں نے پرتپاک استقبال اور مہمان نوازی کرنے پر حکومت پاکستان کا شکریہ بھی ادا کیا۔
