اسلام آباد(مانیٹرنگ ڈیسک/این این آئی) حکومت پنجاب نے ایک بار پھر انسپکٹر جنرل (آئی جی) پنجاب کو تبدیل کرنےکی تیاری شروع کردی۔نجی ٹی وی جیو کے ذرائع آئی جی آفس کے مطابق نئےآئی جی پنجاب کیلئے 3 نام وفاق کو بھجوا دیےگئے ہیں، نئےآئی جی کیلئےانعام غنی،

عامر ذوالفقار اور فیاض دیو کےنام شامل ہیں۔ذرائع کا کہنا ہے کہ موجودہ آئی جی راؤ سردار نے سیاسی مداخلت سے انکار کردیا تھا۔ذرائع آئی جی آفس کے مطابق تینوں کے ناموں کا پینل آج وفاق کو بھجوا دیا گیا ہے۔ پنجاب کے موجودہ آئی جی راؤ سردار کو 7 ستمبر کو تعینات کیا گیا تھا۔آئی جی کی تبدیلی ہوئی تو پنجاب میں پونے 4سال میں 8 واں آئی جی تبدیل ہوگا۔علاوہ ازیں چیف سیکرٹری پنجاب کی تبدیلی کیلئے بھی 3نام وفاق کوبھجوا دیےگئے ہیں، یوسف نسیم کھوکھر، طاہر خورشید اور عبداللہ سنبل کے نام شامل ہیں۔دوسری جانب مسلم لیگ (ن) کے رہنما خواجہ محمد آصف نے کہا ہے کہ حکومت پنجاب وفاق سے اپنے من پسند چیف سیکرٹری اور آئی جی کی تعیناتی کا کہا ہے۔اپنے بیان میں خواجہ محمد آصف نے کہا کہ چیف سیکرٹری اور آئی جی پنجاب نے پی ٹی آئی منحرف اراکین کی غیرقانونی گرفتاری سے انکار کیا ہے۔انہوں نے کہا کہ نئے وزیر اعلیٰ کے انتخاب تک منحرف اراکین کو غائب کرنے کے غیر قانونی اقدام سے انکار کیا گیا۔ن لیگی رہنما نے کہا کہ غیر قانونی احکامات نہ ماننے پر حکومت پنجاب نے وفاق سے چیف سیکریٹری اور آئی جی کو ہٹانے کا کہا ہے۔انہوںنے کہاکہ حکومت پنجاب نے وفاق سے اپنی پسند کے چیف سیکریٹری اور آئی جی تعیناتی کا کہا ہے۔