اسلام آباد (مانیٹرنگ ڈیسک/این این آئی )وزیر اعظم عمران خان کے معاون خصوصی شہباز گل کا آج بیرون ملک جانے کا امکان ہے۔بیرون ملک جانے کی اطلاع شہباز گل خود گزشتہ روز سپریم کورٹ کے باہر میڈیا سے گفتگو کے دوران دے چکے ہیں۔میڈیا ٹاک کے دوران شہباز گل نے کہا تھا کہ اس ویک اینڈ پر بیرون ملک جاؤں گا اور پیر کو واپس آجاؤں گا۔انہوں نے مزید کہا تھا کہ اس لیے بتا کرجا رہا ہوں کہ آپ بعد میں یہ نہ کہیں کہ بھاگ گیا ہے۔ دوسری جانب مقامی شہر ی نے تحریک انصاف کے مرکزی رہنماڈاکٹرشہباز گل کے خلاف تھانہ بادامی باغ میں اندراج مقدمہ کی درخواست جمع کر ادی ۔شہری سعود احمد ریحان کی جانب سے جمع کرائی گئی درخواست کے متن میں کہا گیا ہے کہ ڈاکٹر شہباز گل نے مقدس ہستیوں کے بارے میں توہین آمین کلمات کہے ۔شہباز گل نے عمران خان کا مقدس ہستیوں سے موازنہ کیا ،شہباز گل کے کلمات توہین کے زمرے میں آتے ہیں،شہباز گل کے عمل سے امت مسلمہ کی دل آزازی ہوئی ہے ۔