دبئی(این این آئی) آئی سی سی نے ون ڈے اور ٹیسٹ کرکٹ کی نئی رینکنگ جاری کر دی جس کے تحت پاکستانی بیٹسمین امام الحق ون ڈے میں تیسری ،فاسٹ بولر شاہین شاہ آفریدی

ساتویں پوزیشن پر آگئے۔ون ڈے رینکنگ میں پاکستان ٹیم کے کپتان بابراعظم بدستور پہلے نمبر پر براجمان ہیں جبکہ امام الحق 7 پوائنٹس کے اضافے کے ساتھ تیسرے نمبر پر آگئے،بھارتی ٹیم کے بیٹر ویرات کوہلی دوسرے نمبر پر ہیں۔بولنگ میں شاہین شاہ آفریدی 8 پوائنٹس کے اضافے کے ساتھ ساتویں نمبر پر آگئے۔ نیوزی لینڈ کے ٹرینٹ بولٹ بدستور پہلے نمبر پر موجود ہیں ،انگلینڈ کے کرس ووکس دوسری اور آسٹریلیا کے جوش ہیزلوڈ تیسری پوزیشن پر ہیں۔ٹیسٹ رینکنگ میں شاہین شاہ آفریدی پانچویں سے چوتھی پوزیشن پر آگئے ہیں۔ پہلے نمبر پر آسٹریلوی کپتان پیٹ کمنز، دوسرے نمبر پر بھارت کے روی چندر ایشون اور تیسرے پر بھارت ہی کے جسپریت بھمرا موجود ہیں۔ٹی ٹوئنٹی رینکنگ میں کوئی تبدیلی نہیں کی گئی۔ پاکستانی کپتان بابراعظم پہلی اور وکٹ کیپر بیٹسمین محمد رضوان دوسری پوزیشن پر بدستور قائم ہیں۔