کیف (این این آئی)یوکرین کی جنگ سے متعلق کییف اور ماسکو کے نمائندوں کے مابین تین مارچ کو ہونے والے مذاکرات کے بعد اس بات چیت کے کم از کم تین شرکا میں ان کو زہر دیے جانے کے آثار پائے گئے۔ یہ بات امریکی جریدے نے اپنی ایک رپورٹ میں بتائی۔ جن تین شخصیات میں زہر خورانی کے آثار پائے گئے، ان میں سے کم از کم دو یوکرینی مذاکراتی ٹیم کے رکن تھے اور تیسرے ارب پتی روسی کاروباری شخصیت رومان ابرامووچ۔ جریدے کے مطابق زہر دیے جانے کے یہ جسمانی اثرات ان تینوں افراد کی آنکھوں میں اور جلد پر دیکھنے میں آئے، جن کی شدت ایک دن بعد کافی کم ہو گئی تھی۔ یہ واضح نہیں کہ اس واقعے کا ذمے دار کون تھا۔