اسلام آباد( این این آئی)وزیر خارجہ شاہ محمود قریشی نے کہا ہے کہ منصوبہ بندی کیا ہو رہی ہے اور کہاں ہو رہی ہے وہ عمران خان کو بتا دیا ہے ،میں وزیر خارجہ ہوں ،میرے سینے میں بہت سے راز ہیں ، خدا کی قسم اگر چاک کر دوں تو یہ منہ دکھانے کے قابل نہیں رہیں گے ۔
پریڈ گرائونڈ میں امربالمعروف جلسے میں خطاب کرتے ہوئے شاہ محمود قریشی نے کہا کہ میں شرکاء سے بڑی اہم بات کرنا چاہتا ہوں ۔ میں پاکستان کا وزیر خارجہ ہوں، میرے سینے میں بہت سے راز ہیں ،خدا کی قسم چاک کر دو ں تو یہ منہ دکھانے کے قابل نہ رہیں لیکن میں ایک حلف کا پابند ہوں ،اس حلف کے سامنے پاکستان کو رسوا نہیں کرنا چاہوں گا۔ میرے علم میں جوبات جومیرے کانوںمیں بات گونجی جو کئے جانے کا ارادہ کیا ،اللہ کوگواہ بنا کر کہتا ہوں کہ وہ اپنے کپتان کو بتا دیا ہے ،منصوبہ کیا ہے ،ارادہ کیا ہے ، منصوبہ بندی کیا ہو رہی ہے کون کر رہا ہے ۔ میں اس کی مزید وضاحت نہیں کرنا چاہوں گا کیونکہ یہ امانت ہے ۔یہ عمران خان کی امانت تھی میں نے انہیںدیدی ہے ،یہ آپ جانیں اور قوم جانے کہ آپ قوم کو کتنا اعتماد میں لینا چاہتے ہیں،یہ فیصلہ آپ کا ہے ۔انہوںنے کہاکہ قوم جب خود داری سے سر اٹھا کر جینے کا عزم کرتی ہے تو مشکلات آتی ہیں ۔انہوں نے شرکاء سے استفسار کیا کیا برداشت کر لو گے، مشکلات برداشت کر لو گے۔یہ کہا جاتا ہے کہ اس قوم میں سکت نہیں ہے ، یہ گھٹنے ٹیک دیتی ہے ، کیا گھٹنے ٹیکوگے یا کھڑے ہو جائو گے۔ ایبلسوٹی ناٹ کی قیمت ہے ،کیا قیمت چکانے کے لئے عمران خان کا ساتھ دو ،گھبرائو گے تونہیں،ڈگمگائو تو نہیں ۔
