کراچی (آئی ا ین پی ) کراچی میں اے این ایف انٹیلیجنس کی جانب سے تین بڑی کارروائیاں کی گئی ہیں۔ تفصیلات کے مطابق تینوں کارروائیوں کے دوران مجموعی طور پر 30 کلوگرام میتھ ایمفیٹامائن (آئس) برآمد کرلی گئی ہے۔ اے این ایف حکام کا کہنا ہے کہ

پہلی کارروائی جناح انٹرنیشنل ائیرپورٹ پر کی گئی ، جہاں آسٹریلیا بھیجے جانے والے کارگو سے 20 کلوگرام آئس پکڑی گئی۔ برآمدشدہ آئس تولیوں میں جذب کی گئی تھی جبکہ کارگو کراچی کی رہائشی امبر رمضان کی جانب سے بک کروایا گیا تھا۔دوسری کارروائی میں سری لنکا بھیجے جانے والے پارسل سے 3 کلو گرام آئس برآمد کی گئی، کارروائی شارع فیصل پر واقع کوریئر کمپنی پر عمل میں لائی گئی۔ برآمدشدہ آئس لیڈیز کپڑوں میں جذب کی گئی تھی جبکہ پارسل شیخوپورہ کی رہائشی شکفتہ بانوں کی جانب سے بک کروایا گیا تھا۔ تیسری کارروائی میں کوریئر کمپنی کے ذریعے آسٹریلیا بھیجے جانے والے پارسل سے 7 کلوگرام آئس برآمد کی گئی، برآمدشدہ آئس 3 عدد جائے نمازوں میں جذب کی گئی تھی۔ پارسل لاہور کے رہائشی ارشد علی کی جانب سے بک کروایا گیا تھا۔